Nga kwah ba u MDC Nongkhroh Moodymmai un jop don burom: Sniawbhalang

Syllad | The Rising MeghalayaJanuary 18, 2025

U Deputy Chief Minister ka Jylla u Ma Sniawbhalang Dhar ula ong “Nga kwah ba u MDC u jong nga un jop don burom bad tam kput na kane ka shnong ka jong phi bad lada u tam kput ngan leh bha iaka shnong ka jong phi hadien ka Election hynrei lada um tam kput, wat ia kaba la mut ban ai ruh phim lah ban tip, ngan hap ban pyrkhat arsien.”

U Ma Sniawbhalang Dhar ula kren ia kane haka jingialang plie paidbah iaka Community Hall jong ka shnong Nongkhroh haka 17 tarik Kyllalyngkot.

“Nga kwah ba haka 21 tarik Rymphang phin ai ka jingkyrshan ia u Ma Jesse Suiam u kyrtong ka NPP na Nongkhroh Moodymmai Constituency khnang ba un jop don burom,” la ong u Ma Sniawbhalang bad bynrap ba katno kan long ka jingsarong ban ioh arngut ki nongmihkhmat kiba don haka bor bad kyntu ruh ban nym thew nym woh iaki jingduna haka jinglong briew namar kum ki nongmihkhmat ki dap da ka jingduna haki liang baroh.

Ula khot la wer ruh ia baroh ki riew rangbah kynthei bad shynrang ban ia don ryngkat bad u MDC da kaba ai ka jingkyrshan ia u ha kane ka MDC Election khnang ba un jop don burom.

Ula kyntu ruh iaki paidbah nongshong shnong ban nym ngop haka jingpynbiej jong kiwei ki seng sain hima sima khamtam ki party thymmai kiba wan ban pynbiej tang haka por Election bad jah klep hadien ka election.

Ula kynthoh ruh iaka party VPP kaba la pynkhih klang iaka jingmut jingpyrkhat jong ki paidbah ha kaba kila bakla haka MP Election kaba la dep bad ha kane ka MDC election ki paidbah kila sngewthuh.

Ula ong shuh shuh “Nga ialeh 3 sien iaka election MLA ngam ju shah rem, hynrei ka jingjop jong nga haki 2 term ngam da sngewhun bha namar nga tam vote tang khyndiat”, la ong u Dhar bad u kyrmen ba ha u 2028, kumba la ioh iaka iing dorbar kaba thymmai, ka pyrkhat pyrdain jong ki nongshong shnong ruh kan long kaba thymmai khnang ban lah ban wanrah iaka roi ka par hapoh ka Constituency.