Nga pdiang ia ka lynti rel ha rilum Jaintia, kan pynmyntoi ia ki paidbah: Comingone Ymbon

Syllad | The Rising MeghalayaOctober 20, 2023

U Myntri sorkar jylla uba khmih ia ka Tnat Food Civil Supply, u Bah Comingone Ymbon haka 20 tarik Risaw u la ong ba u pdiang sngewbha ia ka jingwan jong ka lynti rel hapoh Jaintia Hills namar kane kan wanrah shibun ki jingmyntoi ia ki pidbah.

Haba kren sha ki lad pathai khubor, u Bah Ymbon uba dei ruh u nongmihkhmat ka seng NPP na Raliang ha West Jaintia Hills u la ong; “Nga pdiang sngewbha ia ka jingwan ka lynti rel.Nga la iohi ia kito ki ri kiba don ia ki rel ha kaba ki paidbah ki ioh shibun ki jingmyntoi.”

U la ong, “Ha kine ki khyndiat por ba la dep, Nga la leit sha Garo Hill ban pynher ia ka lama ha ka sngi Laitluid jong ka ri. Hadien kane Nga la leit shapoh steshon rel ha Mendipathar bad Nga la iohi ia ki briew ha kane ka jaka, ki la ioh shibun ki jingmyntoi namar ban leit na Mendipathar sha Gawahati, ki nongkamai taxi ki ju shim T.280 shi khlieh, hynrei lyngba ka rel ka long tang T.30.Ki ju mih na Mendipathar ha ka por 7 baje mynstep bad wanphai pat ha ka por 7 baje janmiet. Ki nongrep kila kit kumba ar bad laitylli ki kriah ha ryngkat ki mar rep kynthup ki soh ba ki pynmih ban die sha Guwahati bad kila ioh nong bha. Wat ki marbam ruh, nga la kylli ha kito ki bnai Nailar na ki dukan ba ka dor jong u khaw ha Resubelpara ka long T. 31 katba hangne ha Shillong kala kot T. 44- Katno shuh kala iapher”.

Nalor kata une u  Myntri ula ong ba lada ka lynti rel ka wan, ki paidbah ka Ri-lum Jaintia ruh kin ioh nongshibun. “Ngi don ruh shibun bah ki marpoh khyndew kum u mawshun, u dewiong, ia ki ba ngi la pynkit da ki trok kaba shongdor haduh T. 2000 shiton, Nga tharai lada ngi pynkit da ka lynti rel, kan sa long T, 500 shiton bad T. 1500 kan rung noh sha pla” ula bynrap.

Haba kyntait ban kynthoh ia ka jingiai bteng ka jingpyrshah jong ki Sengbhalang ban wanrah lynti rel, u la ong ba dei namar ka jingsheptieng ia ka jingrung kyrthep ki mynder, ka Sorkar kala dep ban mynjur ia ka official resolution ba kyrpad ia ka Sorkar Pdeng ban pyntreikam noh ia ka Inner Line Permit (ILP) hapoh Meghalaya.

U la ong shuh shuh ba mynta ka rai ha kaba iadei bad kane ka phang ka shong ha ka sorkar pdeng, bad ai ba ka sorkar pdeng kan mynjur halor kane.

Na ka liang ka sorkar jylla dang shen kala rai ban wad ia ki lad ki lynti kiba lah ban pynurlong ia ka jingwanrah lynti rel ha East Jaintia Hills District.