Ngam dei kaba la shah rai pynrem, ki party sain hima kim dei ban shim kabu na ka jyrsieh thungkam: Ampareen

Syllad | The Rising MeghalayaDecember 1, 2023

Ka kyrtong ka Seng NPP ka ban iakhun ia ka ilekshon Lok Sabha na Shillong Parliamentary seat, ka Dr Ampareen Lyngdoh haka sngi Palei ka la kyntu ia ki seng sain hima ba ki dei ban kiar na kaba kynthoh halor ka jyrsieh thungkam nonghikai namar kane ka kam ka dang don hapoh ka iingbishar.

Haba kren sha ki lad pathai khubor ka Dr Ampareen ka la ong ruh ba kam pat shym la shah pynngat ne shah rai pynrem ha kaba iadei bad kane ka case kaba dang don mynta hapoh ka jingshim bishar hapoh ka iingbishar.

“Ha ka jingshisha kan ym long ban kren halor kane ka bynta, hynrei Ngam pat ju shah pynngat satia ha kano kano ka khep. Ai ba ki party sain hima kin ym shim kabu ia kane bad ban pynman ia kane kum kaba nga la shah rai pynrem. Ka jingshisha ka long halor ia baroh bad ieng halor kata. Ngan ym lah ban kren palat nalor kane, hynrei nga ngeit ba ka jingshisha hi kan sa paw. Wat pyndonkam ia kane namar kan sa poi hi ka por ba kan don ka jingktah na baroh kine kiei kiei. Ngan ym kren palat na kane.”

Shuh shuh haba pynpaw ba ym ju don satia u briew u ban shah rai pynrem khlem da lah ban pynshisha, kane ka nongmihkhmat ba san samoi ka jylla kala ong “Pyndonkam ia ka, kawang ktieh katba mon, ngam sheptieng satia namar nga la leh shibun ki kam ba kham khraw. Bad haba nga leit sha iingbishar nga tip ia kaei kaba la iakren, ym ki briew ha lynti surok ne ki riew sain hima ki ban ban pyrshang ban iakhun ia nga da kata. Nga long kaba la khreh, ngan ieng iakhun ia phi”.