Ngam jyllop ka khynnah Khasi ha wah Barak, Assam

Syllad | The Rising MeghalayaFebruary 22, 2021

Kawei ka khynnah skul kaba dang 11 snem ka rta kaba pule haka kyrdan klas VI kala ngam jyllop haka wah Barak, Badarpur, Assam haka Sngi U Blei.

Kane ka jingjia kala jia haka por kumba 2 PM, katba 4 ngut shi paralok kila leit sum ha wah Barak kaba don hajan ka hostel ka skul jong ki ka St. Joseph’s School Badarpur.

Ka khubor ka iathuh ba kane ka khynnah kala syntuid shapoh um bad ki paralok kiba leit sum lang kiba don 3 ngut kila pyrshang ban iarap iaka, hynrei maki ruh kila ngam jyllop lang. Ia kine ki lai ngut la ioh pyllait im iaki da ki nongtong dohkha.

Kane ka khynnah kaba ngam jyllop ka dei kaba la tip kyrteng kum ka Riya S Pyrtuh kaba naka shnong Patla Punji kaba hap ha Mouza Chandipur Pt 1, PS Algapur, District Hailakandi.

U Deputy Commissioner Karimganj ula thoh shithi sha u DC ka Sylhet, Bangladesh ban kyrpad ban iarap ban wad ia kane ka khynnah kaba haduh bala thoh iaka khubor ruh ym pat lap satia iaka.

Ki nongialam ka Khasi Students’ Union (KSU) bad ka Barak Valley Khasi Jaintia Welfare Organisation (BVKJWO) kila kyrpad ia u DC ka Karimganj ban bteng ban wad ia kane khynnah kaba ngam jyllop.