Ngam kular, hynrei ngan pyrshang ban wanrah iaka jingkylla ong u Dr WR Kharlukhi

Syllad | The Rising MeghalayaJuly 7, 2020

U MP Rajya Sabha ba thymmai ka Jylla u Dr. Wanwei Roy Kharlukhi, ula ong “Ngam kular ei ei, hynrei ngan pyrshang ban wanrah iaka jingkylla bad ngan iasaid haka iing dorbar thaw ain ban pynioh iaka hok u paidbah ka Jylla,”

“Ngan buddien ha Delhi iaka resolution CAA ha Delhi ban pyllait iaka jylla ka jingpyntreikam iaka CAA, kaba ka sorkar MDA ruh kala shim iaka rai ban pyllait iaka jylla naka CAA.” la ong u Dr. Kharlukhi haba kren bad u syllad.com hadien ka prokram pynkup burom kaba la pynlong da ka Dorbar Shnong Ladthadlaboh ka shnong kaba ula heh la san haka sngi ba Ar.

“Ngan pyrshang katba lah ban shakri ia u paidbah katkum ka bor jong nga. Kane ka dei ka sien kaba nyngkong ban don bynta haka politik sorkar hadien ki phew phew snem ba nga long tang kum u nongialam ki seng sain hima bad u nongialap ban pynjop iaki party ha ki elekshon bapher bapher bad mynta ka dei ka pali jong nga ba ngan pyrshang katba lah ban pynurlong iaka jingangnud u paidbah ka jylla,” ong u Dr Kharlukhi.

Haba kylli ha kaba iadei bad ki maw jynthud ban wanrah iaka roi ka par ka Jowai, u MP ula ong ba halor ka roi ka par ka Jowai la iakren naka por sha ka por bad nangne shakhmat un pyrshang katba lah ban wanrah iaka roi ka par.

Ka Dorbar Shnong Ladthadlaboh, Jowai kala pynkup burom ia u Dr. WR Kharlukhi halor ka jingjop jong u kum u MP Rajya Sabha jong ka Jylla.

Ka Dorbar Shnong kala pynlong ka jingialang kaba lyngkot katkum ki jingbthah jong ka sorkar lyngba ka tnad koit ka khiah. Ka Dorbar Shnong Ladthadlaboh kala ai sngewbha ruh ia u da ka sati ksiar, ka jain Ryndia bad ka tiar sah jingkynmaw.

Ia ka jingialang pynkup burom la pyniaid da u KD Syngkon, Assistant Waheh Shnong Ladthadlaboh haka jingiadonlang u Waheh Shnong u LD Lakiang, u General Secretary Abm Shullai, u JM Paswet, Finance Secretary nalor kiwei kiwei ki riew rangbah bad ki sengsamla (LYSO) bad seng longkmie (LWO) ka Ladthadlaboh.