Ngam long pyrshah ia ka party, nga pyrshah ia ki rukom treikam: Adelbert Nongrum

Syllad | The Rising MeghalayaApril 5, 2025

U MLA ka Voice of the People Party (VPP) na North Shillong uba la shah sospon, u Bah Adelbert Nongrum ha ka 4 tarik Iaiong u la ong ba um um long pyrshah ia ka party, hynrei u long pyrshah ia ki rukom treikam jong ka da kaba kyntu ruh ia ki nongialam ka party ba kin shu beh beit lada kim shaniah shuh ia u.

“Sngewbha wat ialam bakla. Ngam long pyrshah ia ka party, Nga pyrshah ia ki rukom treikam jong ka. Ki la pynkhein ia ki riti treikam ne constitution. Jin da nga dei uba pyrshah party, nga la dei ban mih noh bad kyrshan ia kiwei pat ki party sain pyrthei,” ong u Bah Adelbert haba kren sha ki lad pathai khubor da kaba bynrap, “Hashwa ban leit sha ka jingiathep vote, nga la pynbna ba ma nga ryngkat ka iing ka sem ngin ai ka jingkyrshan kaba pura ia u Prah. Kumno ngan long pyrshah party? Lane hato ka dei tang ka jingai daw namar ba phim sngewtynnad ia nga? Lada phim shaniah shuh ia nga, shu beh noh ia nga, ym donkam ban pan jingshai ne ban sospon, shu beh beit.”

U la ong ruh ba ka jingshim rai jong ka VPP ban sospon ia u haduh lai snem kynthih la iohi ba ka long beit kum ka jingbeh noh ia u na ka party.

Da kaba shim ia kane ka rai kum ka bym lah ban pdiang, u Bah Adelbert u la ong, “Ki nongialam ka VPP ki la ong ba ym don kiba long halor ia ka party, hynrei la ka long na ka bynta ka party ne constituion ha kaba iadei bad kane ka phang, ka jingsngewthuh ka kham khraw ban ia ka ain ba la thoh. Nga dang pynkhreh. Ngam kwah ban shim ei ei shaphang jong ki hynrei nga shu kwah ban pynshai sha ki paidbah khnang ba kin tip.”

“Nga la iakhun haduh san tylli ki elekshon khlem da iapein halor ki mat. Nga kyntu ia ki nongkyrshan jong nga ba kim dei ban duh jingkyrmen. Watla ka party ka la beh noh ia nga da ka rukom ka bym shym la thmu (indirectly). Watla ngam lah shuh ban kren na ka bynta ka sur jong ka VPP hynrei ngan iai bteng ban kren na ka bynta ki paidbah bad ban long ka sur jong u paidbah. Ha kine ki taiew ban wan ngan sa kren lut shisien kren halor kiei kiei baroh,” u la bynrap.

Nalor kata u Bah Adelbert u pynkynmaw ruh sha ki paidbah ba u la rung sha ka VPP da kaba pynshong nongrim halor ki mat hynrei ym na ka bynta ban ioh ia ka tiket jong ka party.

“Nga la pyniasoh bad ka party da kaba pynshong nongrim halor ka jingiateh ba kan shim ia ka mat ne issue kaba iadei bad ka State Reservation Policy.” Nga kyntu ia ki paidbah ba ka don ka por na ka bynta kiei kiei baroh. Ka shong ha phi ban bishar,” u la ong.