Ngam shim pyndonkam iaki social media ba biang ki jingshakri ki nongthoh khubor na rilum Jaiñtia: Garod LSN Dykes DC West Jaintia Hills

Syllad | The Rising MeghalayaJuly 17, 2021

“Ngam shim la pyndonkam satia iaki khubor paidbah naduh ka facebook, twitter, instagram kiba tip kum ki social media bad kiwei kiwei namar ba nga iohi ba biang ka jingai jingshakri ki khubor na rilum Jaintia,” la ong U Ma Garod LSN Dykes, Deputy Commissioner, West Jaintia Hills District.

U Ma Garod LSN Dykes ula ong ia kine ki ktien haka jingpynkup burom ka Dorbar Chnong Tympang Iawmusiang iaki nongthoh khubor ka district hapoh ka lama jong ka Jaiñtia Journalist Association (JJA) haka sngi Saitjain halor ka jingshakri jong ki manla ka sngi ban ai jingtip ia u paidbah khamtam ha kum kane ka por ka saw ka sian na ka jingwan lynsher ka jingpang khlam COVID-19.

“Baroh ki khubor kiba u paidbah u dei ban tip ki nongthoh khubor ka district kila thoh bad kila pyndep hok iala ka kamram ban sam jingtip sha u paidbah khlem kano kano ka jingshah liang bad kane ka dei kaba nuksa kaba bha haka synshar paidbah ba ki nongthoh khubor kin long pdeng,” la ong shuh shuh U Ma Garod LSN Dykes.

U Ma Garod ula ong “Ka daw ba ngam pyndonkam ia kine ki khubor paidbah namar ba naka bor district kino kino ki jingpynbna ba donkam ruh la pyllait haka official website ka district westjaintiahills.gov.in nalor ka jingshakri kaba ai ki nongthoh khubor.”

Shuh shuh ha kaba iadei bad ka jaka theh ñiut bad ka jingshongdie madan ha sor Jowai ula DC ula ong ba ka bor synshar district ryngkat bad ka Jaintia Hills Autonomous District Council, Jowai Municipal Board bad ula MLA Jowai u ma Wailadmiki Shylla kila shong jingialang naka por shaka por ban wad iaka jaka kaba paka ban ioh iaka jaka bret ñiut kaba pura.

U General Secretary, JJA U Russel Nongrum uba long ruh u editor jong u syllad.com “Ngim poi pyrkhat ban ioh iaka jingithuh halor ka jingshakri jong ngi ban sam jingtip jingnang sha u paidbah lyngba ka kam thoh khubor. Hynrei kaei kaba ka dorbar chnong Tympang Iawmusiang kala leh ka pynkmen ia ngi bad kan ai mynsiem ia uwei pa uwei u dkhot JJA ne ki nongthoh khubor ban trei shitom ban pynpaw iaka rah iaka sur u paidbah sha ka tyndong shkor ka sorkar.”

Ha kaba iadei bad ka jingbret ñiut bad ka jingshong die madan ha Jowai, u Russel Nongrum ula kyntu iaka bor district ban wad ki lad ban pynjem ia kane ka jingeh ym tang iaka pateng kaba mynta ha kaba iadei bad ka jingbret ñiut, hynrei ban shim iaka sienjam ka ban neh junom ban suk ka pateng ka ban wan namar ka jingiakhun pyrshah iaka jaboh jabain kadei kawei na ki mat kaba ka Jowai kan shem jingeh bha.

Shuh shuh u Russel Nongrum, ula ong ba ki nongthoh khubor kim lah ban trei lane ai ka jingshakri ia u paidbah lymda don ka jingiatreilang bad ka jingai jingtip sha ki nongthoh khubor ne ki khubor kaba lah ban rah iaka sur u paidbah bad ka jingeh jong u paidbah.

U ma Edystone Shylla, Waheh Chong Dorbar Tympang ula kyntu iaka bor district ban shimkhia iaka kam bret ñiut bad jingdie madan ha Iawmusiang namar ba la ilji ban peit iaki jaboh jabain kiba mih man ka sngi ha Iawmusiang.

Ula ai khublei ia baroh ki nongthoh khubor kiba la ai ka jingshakri jong ki hala ki jong ki rynsan khamtam ha kaba iadei bad ki kam shnong bad ki jingpynbna kaba u paidbah u dei ban ioh jingtip ban ban tei iaka imlang ka sahlang.