Ngan ïaineh ha ka AITC, bun kiba wan phon pah ong u MLA

Syllad | The Rising MeghalayaMay 13, 2022

Ha kine ki khyndiat taïew bad ki sngi, ki la paw ha ki lad pathai khubor ba ma nga lem bad ki katto katne ngut ki para MLA ngi don jingthmu ban iehnoh ïa ka seng All India Trinamool Congress (AITC) bad ban leit pynïasoh sha kiwei pat ki seng saiñpyrthei.

Ha kaba ïadei bad kane, nga kwah ban pynshai ba ngam don satia kano kano ka jingthmu ban leit sha kiwei pat ka seng. Hynrei hangne, nga kren tang na ka bynta ïalade bad ym na ka bynta kiwei pat ki para MLA.

Nga la pule ïa ki jingthoh ha ki lad pathai khubor bad nga shem ba ki long kiba thamula bad kiba ïalam bakla. Ka long ka jingshisha ba ki la don ki seng saiñpyrthei kiba la wan ban ïakren bad nga ryngkat bad ki jingtyrwa bad ki jingpynbiej kiba bun rukom. Kane ka la ïaid mynta la katto katne bnai. Hynrei kaei kaba nga sngewthuh ka long ba kane ka jingtyrwa bad jingpynbiej ka pynpaw ïa ka jingbym kheiñ snep jong kine ki seng saiñpyrthei ïa la ki jong ki nongïalam ha ki shnong bad ki paidbah nongkyrshan ki jong ki. Ka pyni ruh ba kine ki seng saiñpyrthei ki long kiba kloi ban hiar haduh kano kano ka kyrdan ruh tang ban tan ïa ki MLA kiba mynta.

Nalorkata, ki jingtyrwa kiba pyrshang pynjawdud bad pynbiej ki dei tang ki jingthmu ban pynsngap jar ïa ki nongïalam kiba ju kren barabor na ka bynta ki jingeh jong ki paidbah. Da kaba leh kumne, ki thmu ruh ban pynklet ïa ki paidbah ïa ki jingeh kiba ki la mad namar ki kam be-aiñ bad ka jingbym ïaid beit ka synshar ka khadar kiba ngi sakhi hapoh ka jingïalam jong kane ka sorkar ba mynta.

Halade hi nga shim ba ka saiñ hima sima ka dei ka kam kaba kyntang na ka bynta ban ai ïa ka kti kamon kti kadiang ha ka jingpyrshang ban pynurlong ïa ki jingangnud jong ki paidbah. Ngim dei kiba lalot shuki ha Secretariat. Ngi don hangne ban kren ïa ki jingeh jong ki paidbah bad ïa ka jingbym ïaid beit ka synshar ka khadar. Ngi ïohi ïa ki jingdkoh ha ka jingsynshar la jan man la ka sngi. Kane ka sorkar kaba mynta ba ïadonkti lang ki seng saiñpyrthei bapher bapher hapoh ka lama jong ka Meghalaya Democratic Alliance ka hap ban shim jingkitkhlieh halor kine ki jingdkoh bad jingbym biang ka synshar ka khadar, bad na ka bynta ka jingpynbud nam ïa ka kyrteng jong ka Meghalaya.

Kum ka Liang Pyrshah, ka AITC kan ïai bteng ban kren na ka bynta ki mat kiba ktah ïa ki paidbah bad ban long ka sur jong ki nongshong shnong.

Namarkata, nga kwah ban pynshai biang sa shisien ba baroh ki jingmih khubor ba la kam ba ngan leit pynïasoh noh sha kiwei pat ki seng ki long kiba bakla bad kiba ïalam bakla. Ngan ïaineh ha ka AITC bad ngam don jingthmu eiei ban leit pynïasoh sha kiwei pat ki seng.

George B. Lyngdoh, MLA
Vice President, AITC