Ngan leit ai khublei ia u MP ka Shillong lada ioh sa T. 290 klur ban pynbha ia ka surok NH-6; ong ka Santa Mary

Syllad | The Rising MeghalayaJuly 5, 2024

Ka nongialam ka NPP kaba dei ruh ka MLA na Sutnga Saipung, ka Kong Santa Mary Shylla ha ka 4 tarik Naitung ka la ong ba kan leit iakynduh bad ai khublei da lade hi ia u MP ka VPP na Shillong u Dr. Ricky AJ Syngkon lada ka Meghalaya kan dang ioh biang ia ka song pisa kaba T.290 klur na ka bynta ban pynkhlain bad pynbha ia ka surok bah National Highway-6 kaba la sniew.

“Ngi sngew kmen ba u MP ka Shillong u la shimkhia ha kaba u la ong ba u la ioh ia ka song pisa kaba T. 290 klur namar ba na ka liang ka sorkar jylla ka la dep ban ioh T.200.81 klur,  kumta kan long kaba bha shibun na ka bynta ka jylla jong ngi lada ngi ioh sa kawei pat ka song pisa kaba T.290 klur, ka ban kynjoh sha ka T.490 klur tyngka baroh,” ong ka Kong Santa Mary lyngba ki nongpathai khubor.

“Ngin kham kmen shuh shuh bad Nga hi shimet ngan leit ban iakynduh ia u bad ai khublei kyrpang ia u ba u la lah ban pynioh biang sa ia kane ka song pisa kaba thymmai”, ka la ong.

Kane ka jingpynpaw da kane ka nongïalam ka NPP na East Jaiñtia Hills ka long ruh halor ki jingmih khubor kiba la kam ba ka sorkar Pdeng ka la pynbna ia ka jingmang pisa kaba haduh T. 290 klur na ka bynta ban shna pynbha bad maramot ia ka surok bah NH-6 hadien ka jingïakynduh jong u Syngkon bad u Myntri ka tnad Road Transport and Highways (MoRTH) ka sorkar pdeng u Nitin Gadkari ha ka 3 tarik mynta u bnai.

Hynrei, watla katta ka Kong Santa ka la ong ba ka jingshisha halor kane ka long ba ka sorkar pdeng ka la mynjur ban pynioh ia ka song pisa kaba T.200.81 klur ha u bnai Risaw 2023, ha kaba ia ki kam maramot la aiti sha ki arngut ki kontraktor.“Ka kam ka dang iaid shakhmat. Ki la sdang ia ka jingtrei naduh u bnai Lber ba la dep bad la ai por shisnem ban pyndep ia katei ka surok”, ka la ong.

Nalor kata kane ka nongialam ka NPP ka la ong, “Ngi sngewnguh haduh katta katta ia ka sorkar namar ba ki paidbah ka East Jaintia Hills khamtam ka Ratacherra ki la shem jingeh bad pynlong jingiakhih na ka por sha ka por namar ka jingsniw palat ka surok NH-6 kaba la pynlong ia ka sorkar ban shimkhia ia kane ka kam  bad mynta ngi la ioh ia ka song pisa  kaba T.200.81 klur. Ngi ai khublei ia ka sorkar India bad ka MoRTH bad ngi kyrmen ba ngin sa ioh shuh shuh ia ka song jingiarap ha ki sngi ban wan.”

Shuh shuh ka Kong Santa ka la ong ruh, “U myntri ka sorkar pdeng ha ka jingshisha u dang shu dep pyntip shen halor ka song pisa kaba la dep ban mang kaba long T.200.81 klur. Mynta sa ka pisa ba la pynbna da u MP, ngam don jingtip sa ka pisa aiu pat ba kaba u la kren, bad kumta dei na kata ka daw ba nga sngew klumar khyndiat, hynrei ka jingshisha ka long ba T.200.81 klur la dep ban ai jingbit naduh u bnai Risaw 2023 bad kaba sah ka dang don hapdeng ka jingpynkhreh. Ia ka DPR la dep pynkhreh bad mynta ngi dang ap satang ban mang ia ka. Kaba sah ka long T.89.90 klur. Bad ka jingmang kaba tang shi miet kam lah ban long, tang U Blei uba lah ban leh ia kata.”

Ka jingpynshai na u Secretary PWD (Roas & Building)”

Ha kajuh ka por na ka liang u Secretary incharge PWD (Roads & Buildings) u la pynshai ba ka NHAI ka la ai ka jingmynjur ban pynkhlain bad ban maramot ia ka surok NH-6 hapdeng ka Jowai-Ratacherra lyngba ka song pisa kaba long T.200.81 klur naduh ka 17.10.2023. Kane ka jingmynjur ka dei ruh kaba la pyntip katkum ka shithi No E811162 dated 01.11.2023.

Nalor kata ia ka kam la shim ha ki ar bynta bad la pynmih ia ka tender na ka bynta ka package 1 na ka bynta ban pynkhlain/pynbha, kynthup ia ka kam maramot man ka por, naduh Km 69.200 haduh Km 120.200 la dep ban rai khatduh bad la pynmih ruh ia ka Shithi ioh diang kaba No. 25941 ha ka 07.02. 2024.

Ia ka jingiasoi kontrak la iasoi ha ka 08.03.2024, na ka bynta ka kontrak kaba long T. 77.81 klur bad ia ka kam la sdang naduh ka 23.03.2024.

Ia ka tender na ka bynta ka package kaba ar na ka bynta ban pynkhlain/pynbha, kynthup ia ki kam maramot man ka por, naduh Km 120.200 haduh Km 171.455 la pyndep bad la pynmih ia ka shithi pdiang No. ba la pynmih ha ka 02.02.2024, ha ka jingpyntrei kaba T.122.99 klur ha ka 22.02.2024 bad ka jingpyntrei ka la sdang ha ka 22.03.2024.

Haba phai sha ki jaka jong ka surok NH-06 kiba jur ka jingma na ka jingtwa khyndew, u Secretary ka PWD u pyntip ba ka NHAI kala jied ia ka M/s THDCIL kum ka consultant ban pynkreh ia ka Detailed Project Report (DPR) ban ker kynroh bad pynduna ia ka jinglong ki riat ha ki hynniew tylli ki jaka kiba don jingma bha kynthup ia ka thain Sonapur Tunnel.

Nalor kata u la  pyntip ba ka NHAI kala iasoi ia ka MoU bad ka M/s THDCIL ha ka 15 tarik Rymphang 2024 ban pynkhreh ia ka DPR kaba kot haduh T.89.90 klur bad ia kane ka DPR la dep phah sha ka Regional Office ka NHAI, Guwahati ha ka 18/06/2024 na ka bynta ban leh ia ka tender.

Shuh shuh u la pyntip ruh ba ka NHAI ka dang ap ban ioh ia kane ka song pisa bad u Myntri Rangbah ka Jylla Conrad K Sangma ha ka 24 tarik u Jylliew ula leit iakynduh ia u Nitin Gadkari ban buddien ia kane ka kam.