Ngan synñiang khambun ban ïa u MDC ong u ma Wailadmiki haba plie ïaka ïing dorbar ka Khliehiongriang

Syllad | The Rising MeghalayaSeptember 29, 2019

JOWAI: U MLA jong ka Jowai u ma Wailadmiki Shylla ula ong ba “Ngan synñiang jingïarap khambun ban ïa u MDC ka thain ban tei pyndep ïaka ïing dorbar jong ka dong Khliehiongriang.”

U Ma Wailadmiki Shylla uba long ruh u Chairman Meghalaya Commission on Resource Mobilization haba kren kum u kongsan haka jingplie paidbah ïaka ïing dorbar jong ka Khliehïongriang haka sngi Saitjain, ula ong ba um poi pyrkhat ba kane ka dong kan ïoh jaka ban shna ïaka ïing dorbar namar kadei ka dong kaba khapngiah ha kaba tang ka lynti ïaid kali ruh kalong kaba khapngiah bha ha kane ka dong.

Ula ong ruh ba haka dorkhat ka dong Khliehiongriang ka pan jingïarap pisa na ka bynta ban ïoh tei pyndep ïaka ïing dorbar, hynrei kaei kaba u i donkam bha ban ai jingïarap kadei na ka bynta ban shna ïaka surok ban rung shapoh ka dong bad u kyrmen bad ka jingïalam ba stad ki nongïalam kane ka dong kin lah ban pynbiang ïaki jingdonkam ka dong bad ka shnong jong ki.

U Ma Wailadmiki ula kyntu ïaki nongshong shnong ka Khliehïongriang ban pynbeit ïaka jinglong nongshong shnong jong ki bad ban pynbeit ruh ïaka EPIC namar ba ki nongshong shnong kane ka dong ki don kyrteng kylleng ki jaka thep vote.

U MDC ka thain u ma Saron Pasweth, ula ong ba ka jingïarap ka jong u ban pynïoh T.5 lak na ka MDC Scheme ka dei na ka bynta ban shna ïaka iing dorbar, hynrei haka jngïohi jong ba donkam ban shna shuwa ïaka surok ban rung sha ka ïing dorbar.

Kum u MDC ka thain u kular ban ïatreilang bad ka dong bad ula kyntu ïaki nongïalam shnong ban pyndonkam hok ïaki lad jingïarap kaba kila ïoh.

U Ma H Shylla, u nongaibuit ka dong Khliehiongriang haba ïathuh ïaka khana lyngkot ka jingseng shnong kane ka dong ula ong ba kala sdang naduh u snem 1960-61 bad ha u snem 1989 kila sdang ïaka kum ka dong kaba pura.

Mynshuwa ngi pynlong jingialang ha ki iing briew namar ba kim don ïing dorbar, hynrei da ka jingïarap u MLA barim ka Jowai u Prof. RC Laloo T.10 lak ha u snem 2017 kila lah ban sdang ïaka jingtei bad ki shem jingeh bha namar ba ka jaka kalong kaba sharing bad kaba bun maw.

Nalor kata kila ïoh jingïarap ruh na u MDC barim u Ma Moonlight Pariat haduh T.15 lak ha u snem 2018, kaba kila ïoh kyndiat shisien.

U Ma Shylla ula ong ba ïa kane ka ïing dorbar ki don jingthmu ban shna 2-3 mala khnang ba ki samla ka shnong kin ïoh ban ïalehkai ïaki indoor games.

Kiwei kiwei kiba kren ki kynthup ïa u Pynbeit Laloo u nongai buit ka dong, u K Shylla, u H Hinge General Secretary Khliehiongriang haka jingïalang kaba pynïaid u Waheh Shnong u ma Kermi Ladia.