Ngat 7 ngut ki nongtuh thuk thuk ha ka shrip ki pulit na Amlarem, Pynursla

Syllad | The Rising MeghalayaJuly 26, 2023

Haduh hynniew ngut ki runar kiba donkti ha ka kam tuh thuk thuk kila ngat ha ka shrip jong ki pulit, kata hadien ba laingut ki la shah kem noh na Amlarem bad laingut kiwei pat na ka thain Pynursla.

Kane ka la wan jia hadien ba ka la don ka jingujor ha ka 15 tarik mynta u bnai hapoh Mawngap PS ba ka don kawei ka thuk thuk RS 200 kaba don ia u No. ML-05-P-6045 kaba la shah tuh noh na Umlyngpung, 12 mile, Mylliem ia kaba la rejistar case hapoh Mawngap.

Halor kane ka jingjia na ka liang u Superintendent of Police, East Khasi Hills, Shillong u Bah Sylvester Nongtnger, IPS ula ong ba hadien ba kila ioh ia ka jingtip kaba bniah kumta ruh ki la pynlong ka jingpynap shrip hadien ba ki la ioh ban kem noh ia laingut ki briew kiba donkti napoh Amlarem, katba ia ka thuk thuk la lapdien na ka shnong Padu, Amlarem katba laingut kiwei pat ki la shah kem noh na ka thain Pynursla.

Hadien ka jingpynlong ia ka jingtohkit ia kine kiba shah kynnoh donkti, la ioh ban kurup noh ia kawei ka Pulsar 150 napoh Amlarem bad kawei pat ka Pulsar 220 na Pynursla ki bym don satia ia ki nombor plate bad ia kiba la ngeit ba la tuh ia ki na Amlarem bad na ka thain Pynursla.

Kumjuh ha ka 25 tarik mynta u bnai ki pulit ki la ioh pdiang sa kawei pat ka jingujor hapoh Laban Police Station ba ka don kawei ka thuk thuk Pulsar 150 cc kaba don ia u registration number ML 05-V-0993 kaba la shah tuh noh na Lower Harisabha, Laban. Halor kane ka rejistar case hapoh Laban PS.

Hadien ba ki pulit ki la ioh jingtip, uwei u briew uba la shah kynnoh donkti u la shah kem noh na Shallang ha kaba la ioh ruh ban kurup noh ia kane ka thuk thuk.Nalor kata ki pulit ki la kurup noh ruh ia kawei ka kali Alto 800 kaba don ia u registration number AS 01 DH 2009 ia kaba la pyndonkam ha kane ka kam tuh.

Watla katta la ong ba ki dang don shuh shuh sa katto katne ngut kiba shah kynnoh donkti kiba dang don hapdeng ka jingphet rieh, bad na ka liang ki pulit ki dang pynlong ka jingthwet ban ioh kem ia ki.