Ngat arngut ki snar nonglute ha ka shrip ki pulit

Syllad | The Rising MeghalayaSeptember 21, 2024

Ki pulit ki la ioh ban kem noh ia arngut ki snar nonglute kiba donkti ha ka kam lute ba dang shen da kaba pyndonkam da ki tiar pynmynsaw ha kane ka nongbah Shillong.

Kine ki arngut ki runar kiba la shah kem noh ki dei kiba la tip kyrteng kum u Max Eric Syiemlieh (25) bad u Melvon Tongwah (22 snem rta), pyntip u SP ka East Khasi Hills, u Bah Sylvester Nongtnger ha ka 21 tarik Nailur.

Ka jingioh kem ia ki runar ka la wan long ruh hadien ka jingmudui ejahar hapoh Sadar Police Station ha ka 18 tarik Nailur halor ka jingjia shah lute kaba la jia ha ka 14 tarik mynta u bnai.

U nongmudui u la iathuh ba hadien ba u la khang ia ka dukan ha katei ka sngi, u la shah khang lynti ha ki laingut ki briew kiba la wan da ki scooty hajan ka skul Little Blossom.

Kine ki runar la ong ba ki la sei da ki tiar pynmynsaw bad byrthen hashwa ba uwei pat un wan da kawei ka scooty bad sei da u nar rod.

Kine ki runar ki la talasi ia u bad lute noh ia ka pisa kaba kot T.10,200 kaba dei ka pisa kaba u la die tiar ha kane ka sngi, ong u SP.

Halor kane u pyntip ba na ka liang ki pulit ki la register case bad ha ka jingtohkit bniah ki pulit ki la ioh kem noh ia ki arngut ha ka 20 Nailur.

Nalor kata u SP u la ong ba kine ki runar ki don ruh ka jingiadei halor ka jingjia pyrshang lute napoh ka Hideaway Café ha ka 16 tarik mynta u bnai ha kaba ki la thombor ruh ia uwei u briew.

Ka jingtohkit mynta ia kine ki arngut ka dang iaid shakhmat na ka bynta ban ioh kem sa ia kiwei pat ki suba donkti ha ki kam pyntriem, ong une u heh pulit.