Ngat ka OB shopping mall Khyndailad ha ka jingpluh ding ba shyrkhei

Syllad | The Rising MeghalayaOctober 13, 2024

Ka nongbah Shillong ka la sakhi ia ka jingpluh ding kaba ishyrkhei na ka jingpluh jong ka OB Shopping mall kaba don ha Khyndailad (Police Bazar) ha ka step jong ka 13 tarik u Risaw.

Katkum ki khubor la ong ba kane ka jingjia ka la jia ha ka por kumba 5:45 baje mynstep, bad katkum ki sakhi la ong ba kane ka jingpluh ka la sdang na kawei na ki kamra jong ka Roi-Ki hotel kaba don ha ka mala kaba halor eh jong kane ka iing.

Ki tyllong khubor ki iathuh ba ka daw jong kane ka jingpluh ding ka lah ban dei na ka jingthut ha ka lain bording ilektrik, bad na ka liang ki pulit ki la sdang ban pynlong ia ka jingtohkit ban lap ia ka jingshisha baroh.

Ia ka ding kaba klang la lah ban pynlip noh da ka jingwan poi baing por jong ki kali pynlip ding nalor ka jingiarap da ki nongtrei jong ka hotel.