Ngat ki nongialam ka khun kieng atiar bathymmai ha shrip ki pulit

Syllad | The Rising MeghalayaAugust 16, 2023

Katba ka jingiakren iasuk hapdeng ka sorkar bad ka kynhun kieng atiar Hynniewtrep National Liberation Council (HNLC) ka dang iaid shakhmat, hynrei kyndit ka la mih pyrthei kawei pat ka kynhun kieng atiar bathymmai ha Rilum Khasi Jaintia ia kaba la tip kum ka National Liberation Council of Nongkyndong (NLCN) ka ba paw pyrthei hadien ka jingshah kem noh ki hynniew ngut ki nongialam mynta ka sngi Balang.

Na ka liang u Dy Inspector General of Police (Eastern Range) u David Nestell R Marak u la ong ba ki bor pulit ki la ioh ban kem noh ia hynniew ngut ki nongialam bad ki dkhot  jong kane ka kynhun tang napoh EKHD kaba kynthup ia uwei uba dang hapoh ka rta.

Une u heh pulit u la ong ruh ba kane ka kynhun ka don ka jingiadei bad ka kynhun kieng atiar na Nagaland ka NSCN ha kaba ka la pynkhreh ruh ban phah ia ki dkhot ba nyngkong jong ka na ka bynta ban leit shah hikai pyntbit ha ki kam ialeh pyrshah sha Nagaland ha ka 17 tarik mynta u bnai.

Hynrei hadien ka jingioh jingtip na ka bynta ki pulit ki la pynlong ka jingkhynra mynta ka step sngi Balang bad ban kem noh ia hynniew ngut na ki bynta bapher bapher jong ka EKHD.

Napdeng kine kiba la shah kem ki kynthup ruh ia u Chairman, u Commander-in-Chief, General Secretary, bad ki Area Commander ka West Khasi Hills bad Jaintia Hills, uwei u nongpynrung dkhot bad u nongbuh buh jingthoh lem bad 3 ngut ki dkhot.Na ka liang ki pulit ki la rejistar case pyrshah ia ki hapoh Crime Branch Police Station, Eastern Range bad pynngat ha ki kyndon jong ka IPC bad Unlawful Activities (Prevention) Act.

Mynta ka jingtohkit ia kine ki briew kiba la shah kem kala iaid shakhmat ban lapdien ia kiwei pat ki dkhot jong kane ka seng thymmai.