Ngat sa 4 ngut, kiew sha ka 8 ngut kiba shah kem dawa pisa jubor ha ka kyrteng ki ‘Ki Khlur u Hynniewtrep’

Syllad | The Rising MeghalayaOctober 28, 2023

Sa sawngut ki dkhot ka kynhun runar kaba kynthup ia kawei ka kynthei kiba donkti ha ki kam dawa pisa jubor ki la shah kem noh ha ki bor pulit ka East Khasi Hill napoh Palace Hotel ha Iewduh, Shillong ha kaba la ioh ruh ban kurup ia shibun bah ki kot ki sla dawa pisa nalor ki receipt book kiba don ha ka kyrteng ‘Ki Khlur u Hynniewtrep.’

Ki pulit ki la ioh pdiang ia ka jingujor ba ha ka jan miet jong ka 26 tarik mynta u bnai, kine ki suba runar ki la dawa T.15,000 bad ki la wan poi ruh ban shim ia kane ka pisa hynnin ka sngi Thohdieng.

Na ka liang ki pulit ki la rejistar case pyrshah ia kine ki briew hapoh Lumdiengjri PS bad pynngat ha ki kyndon bapher bapher jong ka Indian Penal Code (IPC).

Shah kem saw ngut kiba donkti dawa pisa ha ka kyrteng ki sengbhalang na nongbah Shillong

Lah ban kdew ba dang ha ka sngi Palei ba la lah, sawngut ki briew ki la shah kem noh na ki jaka khaii pateng ha ka nongbah Shillong, kata ha ka por ba ki dang pyrshang ban ai shiti dawa pisa sha ki nongkhaii.

Na kine ki pulit ki la ioh ruh ban kurup shibun bah ki tiar, kata kaba kynthup ia ki  ki shithi dawa pisa ha ka kyrteng jong ki sengbhalang bapher bapher ki bym pat shym la bnai pyrthei, kata laitylli ha ka kyrteng jong ka Hynniewtrep People Defense Alliance (HPDA), lai ki receipt book ha ka kyrteng jong ka HPDA, artylli ki donation receipt slip kiba don jingiadei bad ka seng United Khasi Movement (UKM), ar ki donation receipt slip jong ka seng Federation of Khasi United People (FKUP), ar ki donation receipt slip jong ka seng Confederation of Meghalaya People (CMP), kawei ka counterfoil receipt slip jong ka  Khun Hynniewtrep Youth Council (KHYC) bad ar tylli ki donation receipt slip jong ka seng Hynniewtrep Youth Regions (HYR).

Ki bor pulit ki la ioh ruh ban kurup noh ia kawei ka Scooty Aprilla kaba don ia u registration number ML05 Q 9828 nalor sawtylli ki mobile phone.