Ngi dei ban phai sha ka juk stad ban ialeh pyrshah kiwei pat ki jingsniew ha kane ka juk ong ka Isawanda Laloo

Syllad | The Rising MeghalayaDecember 31, 2022

Ka Kong Isawanda Laloo, Deputy Commissioner, East Khasi Hills District kala ong ba U Kiang Nangbah ula iathuh lypa ia ngi shuwa ban shah sdien phasi ba lada phai ka khlieh jong u sha kaliang mihngi, ngin ioh iaka jinglaitluid hapoh 100 snem, U Kiang Nangbah ula ai ia ngi iaka jingkyrmen bad kine ki ktien khatduh jong u kila urlong.

“U Kiang Nangbah u pynkynmaw ia ngi ban phai sha ka juk shai, juk stad ban ialeh pyrshah iaka jingsniew ha kane ka juk,” la ong ka Kong Isawanda.

Kane ka por ka por kam dei shuh ka por ban ialeh iaka sorkar phareng ne ki nongsynshar na kiwei pat ki jaka, hynrei ka jingialeh kadei ka jingialeh iaka jingsniew ba har rukom ka pyrthei da ka jingnang jingstad, kala ong ka Kong Isawanda haba kren kum ka kongsan haka jingialang kynmaw burom iaka sngi iap ba 160 snem U Kiang Nangbah ha Mynkoipyrdi Iongpiah Jowai kaba la pynlong da ka Seinraij Jowai.

Ka kong Isawanda kala ong ba lada phai sha ka jingiakhun jingialeh U Kiang Nangbah ha kito ki por pyrshah iaka sorkar phareng, kam dei kaba suk namar ba ngi dei ki briew kiba sahdien tam, haba ianujor bad ka bor synshar ka sorkar phareng, hynrei U Kiang Nangbah bad ki nongbud jong u ki don ia kata ka jingstad bad ka sap nylla ban pynher syrngiew iaka sorkar phareng bad um tieng u smiej ban pha iaka jingim ban ioh iaka jingjop.

Kumta ma ngi ruh ngi dei ban dur iap ban trei shitom ha kano kano ka kam kaba ngi trei bad ban bud iaki dieng jat jong u bad ban long ki nuksa ban im hok ban im miat ban long kita ki khlawait ne ki nongialam.

Hashwa kane kum ka dak ban burom ïa u khlawait ka rilum Jaintia la leit buh syntiew ruh ha u mot dur jong u Kiang Nangbah ha u Lum Mooliksoo.

U Ma OR Shallam, President Seinraij ula ai ki kyntien maitphang, u Wyraiki Kharbukhi, Executive Member Seinraij ula ai ka nguh ka dem katba u Dolloi ka Elaka Jowai u Bah Puramon Kynjing ula ai ki kyntien pdiang burom bad u Ma Arwotki Sumer, General Secretary haba kut ka jingïalang ula ai ki kyntien khublei. 

Ka Seinraij Jowai ha une u snem ka la jied kyrpang ïa u Ma Lammat-O Laloo, Secretary Land Committee Seinraij ban ai ka jingkren kyrpang ha kaba ïadei bad u Kiang Nangbah.

U Professor LS Gassah kum u riew shemphang ula pynwandur ïaka jingkren jong u ïa kawei ka mat jingïakhih pyrshah jong u Kiang Nangbah ïaki bor ka sorkar phareng kaba tip kum ka khajna ïing.

Katkum ki sakhi satar ba la ïoh da u Professor Gassah uba pule na ki jingthoh jong ki British u sngewthuh shai ba ka thong bad ka buit treikam hi jong ka sorkar phareng kadei kumno ban pyndem bad pynkohnguh ïaki khun ka Ri Jaintia haka jingpynïaid jong ki.

Ula ïathuh hadien ka jingshimti ka sorkar phareng ïaka synshar naduh u snem 1835 haduh 1860 ki khun ka Ri Jaintia kim donkam shuh ban siew khajna (Tax) lait noh tang ka jingai kaba shisien shisnem sha ki Elaka da ki blang, ki sniang, ki syiar kumba juh leh haka por synchar ki syiem tangba suki suki ka sorkar Phareng ka wanrah bad pynmih ïaki khajna bapher bapher.

U Prof Gassah ula iathuh ïaka buit treikam ki khun ka ri Jaintia kaba la buh ïaka sorkar phareng haka jingdum buit. U Professor L.S.Gassah ula kyntu ïaki khun ka Ri Jaintia kiba im ha kane ka juk shai juk stad ban wad bniah ïaka khana shaphang u Kiang Nangbah namar haka jingngeit jong u dang don shibun kiei kiei kiba rieh kiba kane ka juk ka por ka dawa ban leh ïa kata.

Ha kawei pat ka prokram kaba la pynlong da ka Kiang Nangbah Ïasiat Khnam Memorial Society (KNIKMS) ha Madan Madiahkmai Blai ha Syntu Ksiar ha kaba U Wailadmiki Shylla MLA ka Jowai Constituency ula long kum u kongsan, katba u Dolloi ka Elaka Jowai u Ma Puramon Kynjing ula long kum u symbud kongsan.

U Wailadmiki Shylla haka jingkren ula ong wat la ka ri ka lait na ka jingsynshar ki phareng hynrei ka jaitbynriew ka dang shah thombor ha kiwei pat ki dur ki rukom bapher bapher. Ula kyntu ban pynneh pynsah ïaka jinglong kyrpang ka jaitbynriew.

La pynphuh pynphieng ïa kane ka sngi da ki jingrwai, jingshad bad jinglehkai drama bad la sam khusnam ruh ïaki nongjop haki jingïakop bapher bapher.

Ha kane ka sngi u MLA ka Jowai ula pyllait paidbah ruh ïaka kot shaphang u Kiang Nangbah ba la thoh da u Riquoma Rq. Laloo.

Hashwa ka jingïalang u kongsan ula lamkhmat ban buh syntiew ha u mot sahnam u Kiang Nangbah ha kaba la ïa shim bynta ruh da ki nongïalam bad ki dkhot sengbhalang bapher bapher.

Shuh shuh ïa kane ka juh ka sngi ka kynmaw burom da ka Lei Synshar Cultural Society, Jaintia Hills da kaba leit ïuhkjat ha Lum Mooliksoo bad la pyndep ruh ïaka nguhblei nguhsyiem bad thang mombati haka jaka ba la pynïeng ïa u mot sahnam sah kynmaw u Kiang Nangbah. Ïaka jingïalang kynmaw burom ïa u Kiang Nangbah la pynïaid da ka Mina Laloo, President Lei Synshar Cultural Society katba u Kamnipaia Challam, Secretary Lei Synshar Cultural Society ula ai ki kyntien nguh blei nguh syiem.