Ngi ïoh khajna na u deiwong, ban kren hapoh dorbar ym ïoh ong ki MDC BJP

Syllad | The Rising MeghalayaNovember 23, 2019

JOWAI: Ki MDC jong ka Bharatiya Janata Party (BJP) kiba don haka liang pyrshah kila ong “Ngi ïoh khajna na u dewiong, hynrei ka resolution kaba ngi thmu ban wanrah haka Dorbar Tlang halor kam tih bad khaïi dewiong kala shah kyntait ha u Chairman Jaiñtia Hills Autonomous District Council (JHADC).”

Kane ka Dorbar Tlang jong ka JHADC kan long haka 28 Naiwieng 2019.

“Baroh ki sengbhalang ki nongmihkhmat paidbah kiba rim bad kiba mynta bad ki riew pawkhmat haka kam khaii dewiong kila phai ka khmat sha ka konsil ban pyllait ïaki naka jingtreikam ki aiñ jong ka sorkar kmie halor ka kam khaii tih dewiong, phewse u Chairman jong ka konsil ym ailad satia ïa ngi ban wanrah ïaka resolution ban iakren halor ka kam tih bad khaii dewiong,” la ong ki MDC ka BJP ba kynthup ïa u Krison Langstang, Lakhon Biam bad u Dawan Lyngdoh.

‘Ngi kum ki nongkhmat ngi sngewkhia ïaka jiingeh jong u paidbah hadien ba shah khang tih dewiong, hynrei hadien ba la pynmih ba ka Supreme Court kala pynmih ïaka hukum ban weng ïaka jingtih dewiong bad buh kyndon ban pyntreikam pat da ki aiñ sorkar kmie haryngkat ka jingbuh ïaki kyndon jong ka Mines & Minerals (Development & Regulation) Act, 1957, ka Mineral Concession Rules, 1960, ka Mines Act, 1952, ka Environment (Protection) Act, 1986 bad kiwei de ki Aiñ  bad bthah ïaka sorkar jylla ban shna aiñ bun ki trai par bad ki nongkhaii dewiong kila sah haka umdum namar ba haduh mynta ngim pat ioh ban tih dewiong wat la kaba bun ka khajna ngi ioh na u dewiong,” la ong u Krison.

“Ka kamram jong ngi ka dei ban shna ïaki ain bad ban kyrpad ïaka sorkar kmie bad ka ïing bishar Supreme Court ban pyllait na ki aiñ kiba teh khum bad kiba ktah ïaka jinglong trai khyndew, hynrei ka jingkyntait u Chairman ban pdiang ïaka resolution, ka thew ba ym kwah ba ngin ïatai halor ka kam dewiong hapoh ïing dorbar”, la ong u ma Dawan Lyngdoh bad ula bynrap ba khyndew ka shyiap kadei ka jong ngi trai muluk bad ka dei ka sobjek jong ka konsil bad lada kum MDC kim ioh ban ïakren kam don jingmut kata ka jinglong nongmihkhmat.