Ngim pyrshah Mini Secretariat, wat kynriah iaka North Jowai Division ong ka synjuk waheh chnong Jowai

Syllad | The Rising MeghalayaNovember 9, 2020

Ka Synjuk Waheh Chnong Jowai kaba la mih sha surok ban pyrshah iaka jingpynkynriah iaka ophis ka North Jowai Division kala ong ba kam pyrshah iaka Mini Secretariat, hynrei wat pynkynriah pat iaka North Jowai Division na Jowai sha Shangpung.

U Ma Alan Niangti president Synjuk Waheh Chnong Jowai haba kren ula ong “Ngim pyrshah iaka jingwanrah iaka Mini Secretariat ha Jowai, hynrei kam dei pat ban pynkynriah iaka ophis jong ka PWD North Jowai Division na Jowai sha Shangpung.”

Ula kynthoh ruh ia Dy. Chef Minister ka Sorkar Jylla Bah Prestone Tynsong uba la ong ba la rai ban kynriah iaka North Jowai Division sha Shangpung ba khapngiah, katba u Chief Minister ka Jylla u Conrad ula ong ba ka jaka jong ka PWD ha North Division ka dei kaba biang eh ban tei iaka Mini Secretariat.

U Ma Alan ula buh jingkylli hangno ka nongrim jong ka sorkar haba u symbud myntri rangbah bad u myntri rangbah ruh kam shai ka rukom kren jong ki.

“Ka North Jowai Division ka dei ka ophis kaba rim tam kaba la don naduh u snem 1950 bad lyngba kane ka ophis la miih shibun ki tnad jong ka PWD bad kiwei kiwei ki ophis. Ngi pyrshah iaka jingpynkynriah ia kane ka ophis namar lada pynkynriah kan wanrah shibun ki jingeh iaki nongtrei, ki kontraktor bad ki kam ba iadei bad ka treasury, bank, Dc ophis bad kane ka ophis kam lah ban iaid lait iaka ophis u Superintendinig Engineer PWD (Rds) kaba don ha Jowai,” la ong shuh shuh u ma Alan.

U ma Alan ula ong “Ka khambha shibun iaka sorkar ban pynneh ia ka North Division ha Jowai kaba donlang baroh ki division bapher bapher ban pynsuk ia u paidbah ban pyndep ia kino kino ki kam shijaka.”

Ha kaba iadei bad ka mini secretariat u ma Alan ula ong ba lada dei kumba ong ka sorkar ban tei iaka mini secretariat ha Jowai, ka sorkar ka dei ban wad jaka shawei kaba paka kaba heh kaba biang ki lynti ki synkieng bad kam dei ban wanrah haka jaka ka PWD North kaba khim ka lynti ban rung ban mih.

Ka synjuk kala pynphai ktien kylla ia u myntri rangbah ha kaba iadei bad ka good governance ba kala ong “Kam donkam kata ka good governance tang ha ki kot ki sla, katba ki kam sha khlaw bad baroh ki kam kiba sahteng suda.”

Shuh shuh ka synjuk kala dawa na ka sorkar MDA ban pyndep ia baroh ki projek ba sahteng ka Jowai khamtam ka Iawmusiang, ka Umngot Water Supply.

Hashuwa ban iakren bad ki nongthoh khubor ka synjuk kala rah da ka placard ha phyllaw ka North Jowai Division ban pynpaw jingpyrshah bad dawa ban pynsangeh iaka jingpynkynriah iaka North Jowai Division.