Ngin nym ailad ban pynpra ïaka PHC: Dolloi Darrang

Syllad | The Rising MeghalayaJanuary 8, 2021

U Dolloi ka Elaka Darrang u Ma Pyrwa Lymba bad u Secretary ka Elaka u Ma KM Ryngksai ryngkat ki katto katne ngut ki dkhot nongkitkam jong ka Elaka haka sngi Palei kila leit ban ïakynduh ïa u Deputy Commissioner ka West Jaintia Hills District u Garod LSN Dykes ha kamra treikam jong u ban pynpaw ïaka jingpyrshah kaba jur halor ka rai jong ka sorkar Jylla ban pynheh bad siang surok kaba ïaid lyngba ka Dawki PHC kaba don hapoh ka shnong Bakur Dawki West Jaintia Hills District.

Kane ka surok kadei kaba la bei pisa da ka Japanese International Corporation Agency (JICA) haduh 1377.5 crore kaba kynthup ïaka bai musur jaka ban shna ïaka surok naduh Shillong-Dawki.

“Ka PHC Dawki kaba hap hapoh ka Elaka Darrang ka la ai jingshakri kaba pura bad ai jingmyntoi shibun eh ïaki paidbah jong ka thaiñ”, ong u Dolloi ka Elaka Darrang u Ma Pyrwa Lymba.

Ula ong naduh ba sdang, la tei ïaka PHC Dawki da ka jingïamynjur lang uba bun ba lang, hynrei kyndit kynsan ka jingwan ka project shna surok 2 Lane Shillong-Dawki lyngba ka tnad shna surok Ministry of Road Transport and Highway kin duh noh ïa kane ka jaka sumar namar ka surok ka ïaid lyngba ka PHC.

“Ngi pyrshah ïa kane ka rai jong ka sorkar namar ka khlem ïaphylliew jingmut ne ai jingmut lang hangno ka Centre ban shna biang ïaka PHC Dawki kaba thymmai. Ngin nym ailad ban pynpra ïa kane ka PHC tad haduh ban da ïoh shuwa ïaka PHC Dawki kaba thymmai”, la ong shuh shuh u Dolloi Ma Pyrwa.

Ka ophis u Dolloi ka la kyrpad ïa u khlieh duh ka District ba un shimkhia ban ïakren bad ka sorkar halor kane ka jingeh jong u paidbah ka Elaka.

Na ka liang u Ma Garod LSN. Dykes ruh ula kular ban shimkhia ban iakren halor kane ka jingthmu pynpra iaka PHC Dawki.