Noh synniang u MLA T.1 lak sha i Meirad i ban leit iashim bynta ha ka marathon sha Australia

Syllad | The Rising MeghalayaJuly 16, 2024

U MLA ka South Shillong u Bah Sanbor Shullai ha ka 16 tarik Naitung u la noh synniang T. 1 lak na ka tulop jong u sha i Meirad Kmoin Wahlang i ban leit iashim bynta sha ka jingiakop mareh marathon ka ban long ha Australia.

Ha kane ka jingiakynduh na ka liang u MLA u la pynlong ruh ka jingpynkup burom ia ine i Meirad 76 snem rta hashwa ba in leit ban iashim bynta ha ryngkat ka kynhun ialehkai na India sha ka “13th Pan Pacific Masters Games 2024” ka ban long ha Gold Coast Australia naduh ka 1-10 tarik u Naiwieng 2024.

I Meirad Kmoin Wahlang  na ka shnong Sngimawlein, South West Khasi Hills i dei iba la mihkhmat ia ka Meghalaya ha ki jingiakop mareh marathon ha ki bynta bapher bapher jong ka ri.

Haba kren ha kane ka sngi u Bah Sanbor u la ong ba i Meirad Kmoin Wahlang i long ka nuksa kaba khraw tam na ka bynta baroh kiba kwah ban mihkhmat ia ka jylla bad ka ri hi baroh kawei.

“Kane ka jingiarap kaba rit ka long shibynta ban aimynsiem bad pynshlur ia i Meirad Kmoin ba in nang lah ban trei minot bad ban long ka jingsarong ia ka jylla bad ka ri lyngba kane ka jingleit iakop ka jong i sha Australia,” ong u Bah Sanbor.

Shuh shuh nalor kane ka jingiarap ba T.1 lak, u MLA u la ai sngewbha ruh da ka song pisa kaba T.30,000 sha u Coach u Bah Benningstar Lyngkhoi uba dei ruh u khlur ia mareh thong ba pawkhmat ka jylla.

Lah ruh ban kdew ba na ka liang ka sorkar jylla ka la kular ban pynlut ia baroh ki jingdonkam na ka bynta i Meirad Kmoin Wahlang ha kane ka jingleit iashim bynta sha katei ka jingiakop ka ban long  ha Australia.