Orpait ka dam pynlang umbam umdih ka Jowai, duna um ka jaka tan um

Syllad | The Rising MeghalayaDecember 17, 2020

U MDC jong ka Jowai Central, Awhai Andrew Shullai haka sngi Palei ula hiar dalade sha ka dam kaba pynlang um ban tan um iaka sor Jowai kaba don ha Mupiah, ka bynta jong ka Wah Myntdu bad lap iaka jingorpait ka dam bad duna um ha ka jaka tan um (Sumpwell) ban tan sha treatment plant kaba don ha Urkhla.

U Ma Andrew ula hiar sha kane ka jaka hadien ba la ioh iaka jingujor na kiba bun kiba balang halor ka jingtorti ka jingmaramot ia katei ka dam kaba la julor noh tang hadien katto katne por.

“Nga wan jurip hi da lade khnang ba ngan lap la kadei shisha ne em kumba la ujor da ki nongshong shnong ba la julor kane ka jaka pynlang um bad kane ka jingujor ka long kaba shisha”, ong u Andrew Shullai haba ïakren bad ki lad pathai khubor.

Ula ong “Mynshwa wat la kadei ka por tlang ruh ka um kam juh hiar ne duna haduh katne katne hynrei mynta da ka jingjulor jong ka dam, ka um ka lait noh sharud bad kane ka wanrah ka jingthud haka rukom sam um hapoh ka Shnong Jowai.”

Ula ïathuh ba mynshem snem ïa kane ka dam la dep ban maramot (Repair) hynrei kaba sngewsih ka long ba la shu maramot tang dep rukom namar la ïohi ba iaki jaka ba kane ka dam ka pait ka dei na ka jingtorti ka rukom trei bad duna bha ka dewbilat bad khlem nar rod bad mawria.

“Ka jingduna um haka Sumpwell ruh la shu hap ban tih ne khlong ïaki maw ban pyntuid iaka um ne ba ka um kan rung sha Sumpwell bad ban pump pat sha Treatment Plant kaba don ha Urkhla,” ula ong u ma Andrew.

U Ma Andrew da ka jingsngewkhia ula kyntu ïaki bor ba dei peit kumjuh ka bor sorkar ba kan shimkhia kloi ban pynshna bha noh ïa kane ka jaka pynlang um mynta hi u bnai Nohprah khnang ba kan nym wanrah jingthud haka rukom sam umbam hapoh ka Shnong Jowai.

Ha kaba iadei bad ka Umngot Water Supply ula ong ba kan khambha shibun ban pynbha shuwa ia kane ka dam Mupiah ban pynlang iaka um namar ka Umngot Water Supply ym lah ban tip lano kan sdang ban treikam.