Orpait ka jingkieng Myntang, ujor ka SSDO sha u DC West Jaintia Hills

Syllad | The Rising MeghalayaFebruary 21, 2022

Ka San Shnong Development Organisation (SSDO) kaba kynthup iaki san tylli ki shnong ka Barato, Mukroh, Maitdein, Iongkynshur bad ka shnong Saba kila ujor sha u Deputy Commissioner, West Jaintia Hills District halor ka jingpaw ki dak ki shin ba orpait biang ka jingkieng Wah Myntang (Rymphum) haka sngi Nyngkong.

U General Secretary San Shnong Development Organisation Ma D Timung, ula ong ba ki la ai da ka jingujor sha u Deputy Commissioner halor kane jingkieng kaba pyniasoh iaka shnong Laskein Barato bad kiwei kiwei ki shnong namar don ki dak ki shin ba kane ka jingkieng kala orpait biang.

“Ban shngain ka iaid ka ieng u paidbah ngi la kyntu ia u DC ban pyrkhing iaka jingiaid ki kali heh khamtam ki trok namar ba lada jia ba sniew kane ka jingkieng kan buh haka jingeh ia kiba bun tylli ki shnong ha katei ka thain,” la ong u Ma Timung.

Ka San Shnong Development Organisation kala maham iaki trok kiba kit palat pud lyngba kane ka jingkieng bad la ong ba lada lap ka synjuk kan leh da kaba tyngeh bad aiti sha ki bor jong ka aiñ.

Kumban shu pynkynmaw ka ophis u Executive Engineer PWD (Roads) North Division ha u snem 2020 kala maramot ia kane ka jingkieng hadien kala pei thliew hadpeng ka jingkieng bad la hap ban khang shipor iaka iaid ka ieng ki kali.