Pahara ki nongshong shnong Khliehtyrshi ban khanglad iaka jingthmu bret ñiut ka JMB

Syllad | The Rising MeghalayaApril 24, 2022

Da ki spah ngut ki nongshong shnong jong ka shnong Khliehtyrshi haka jingïalam u waheh shnong u Ma Kitbok Rymbai kila ïamih paidbah kynthei bad shynrang ban ap pahara ban khanglad iaki trok kit ñiut kiba wan na Jowai bad thmu ban leit theh ïaki ñiut haka Pangit Khliehtyrshi haka Saitjaiñ.

Kane ka jingmih paidbah u nongshong shnong ka Khliehtyshi ka jia long hadien ba ka bor synshar district kala pynjari da ka kyndon aiñ 144 CrPC bad ban pynpaw iaka jingpyrshah iaka sorkar iaka jingthmu ban bret niut shipor ha Pangit. Haka miet Thohdieng ka JMB ka kala thmu ban leit bret iaki ñiut haka jaka jong ka JHADC ha Pangit, Khliehtyrshi, hynrei kane ka jingpyrshang kala pulom noh namar ba ki paidbah nongshong shnong kila pakhang lynti iaki trok ka JMB kiba la hap ban leit phai biang sha Jowai.

Pule | Pulom ka kam bret ñiut ka Jowai, mih pyrshah u paidbah ha Khliehtyrchi phiel ka jingpynjari kyndon aiñ 144 CrPC

U Waheh Shnong Khliehtyrshi u Ma Kitbok Rymbai ula ong wat hadien ka jingpyrshah jong ka shnong, hynrei ka bor district ka dang wan ban pynbna da ka kor tyngheng (public address system) ha Khliehtyrshi bala pynjari iaka kyndon aiñ 144 CrPC kaba khang pyrshah iaka jinglum paidbah palat 5 ngut 2 KM na katei jaka bret ñiut ha Pangit.

Kane ka jingwan pynbna kala pynlyngngoh ia u paidbah bad kila mih khrui ban pynpaw shuh shuh iaka jingpyrshah bad artatien ruh ioh ba ka JMB kan wan ban bret ïaki ha Pangit.

U Waheh Shnong ula ong ba kila dep kren shai ba kim ailad ban theh ñiut ha katei ka jaka bad ula iakren ruh bad ka Executive Magistrate, kaba la pynshai ba ka jingpynbna kadei halor ka jingpyntreikam iaka 144 CrPC kaba dei ban pynbna naduh ka sngi/miet Thohdieng bad kane kala pynklumar ia u paidbah ka shnong kaba la pynlong iaki ban mih paidbah biang.

“Lada ka sorkar ka thmu ban leh jubor ban theh ñiut ha katei ka jaka bad mih kino kino ki jingjia ka sorkar ka dei ban shim iaka jingkitkhlieh,” la ong u ma Rymbai.