Pait ka dohnud u kpa u I Love You ba kylla nongpyniap briew ki ar ngut ki khun

Syllad | The Rising MeghalayaMarch 30, 2023

Ka jingkthang bad ka jingpait dohnud kala wan jia haka longïing u ma Bijoy Tariang uba la ri pynheh pynsan iaki khun ban long ki briew kiba tip briew bad ban don ka akor ka burom, pynban ka mynsiem u ksuid kala wan ban thombor iaki kaba kila kylla long ki nongpyniap briew nonglute naka bynta ban ioh iaka spah ka phew kaba shipor.

U Ma Bijoy Tariang u dei u kpa jong u I Love You Talang ba na ka shnong Moorap. U I Love Talang u dei u wei na ki runar ba donkti haka kam pyniap briew bad ula shah pyniap ha ki paidbhur hadien ka jinglait phet jong u na phatok bad ki paralok ha u snem bala dep ha u bnai Nailur 2022.

Tang hadien hynriew bnai uwei pat u khun jong u Bijoy Tariang, u Meban Talang uba dei u para jong u I Love You ula shah kynnoh pyniap ia u Pynkhreh Surong na Mynsngat. Nalor u Meban ar ngut kiwei ki pat kiba shah suba ki dei u Sambun Dkhar na Mynsngat bad u Jimmy Kyndait na Moorap.

Kum u kpa, u ma Bijoy Tariang haba kren haka jingialang pynrem ia ki lai ngut kiba shah kem halor ka jingpyniap ia u Pynkrheh Surong ha Mynsangat haka sngi Palei, ula ong ba u dap da ka mynsiem kaba khia um lah khlem da pynpaw iaka jingshrai ka jingbitar hadien ba ki khun jong u kila kylla long ki nongtuh ki nongpyniap briew. U ne u longkpa ula ong ba ula sngew lehrain ïaka jinglong ki khun namar ba um shym la pynheh pynsan bad bsa ïala ki khun ba kin kylla long ki nongtuh nonglute bad nongpynïap briew.

Pule Shuh | San sngi lynter yn tohkit ki Pulit iaki 3 ngut ki suba pyniap ia u Pynkhreh Surong

U ma Bijoy ula ong kat kane ka jingjah burom bad ka jingshah pynlehrain hala ki jong ki khun lada shah ka aiñ la dei ban shim hi iaka jingim u khun, hynrei namar ka aiñ kam shah ka aiñ. Ula kyntu iaki bor jong ka aiñ ban pynshitom da kaba tyngeh da kaba set byndi shi jingim ne da kaba sdien ha u tyllai phasi bad um don kano kano ka jingbabe bad ka aiñ kan leh ia kaba donkam.

Pule Shuh | Shah kem sa uwei u suba donkti ban pyniap ia u Pynkhreh Surong, ioh biang iaka kali

Ka jingialang paidbah ban pynrem ia kine ki riew thrang snam kala long ha ka shnong Moorap bad Mynsngat ban dawa pynshitom ia ki lai ngut kiba shah kem ha ki Pulit jong ka West Jaintia Hills District halor ka jingpyniap ia u Pynkhreh Surong.

Shuwa ka jingialang ha Mynsngat, ki nongïalam jong ka Dorbar Shnong Moorap kala kyrpad jur iaki pulit hadien ka jingïoh kem ïa ki arngut ki riew thrang snam napoh shnong ban pynshitom iaki katkum ki kyndon jong ka aiñ.

Ka bor shnong kala kyntu jur iaki pulit ban tohkit bniah bad ban sei madan ïa kiwei pat ki riew thrang snam ne runar kiba im lait lait lan ha rilum Jaintia ban kaba kamai spah da kaba tuh, lute, pynïap briew bad kiwei ki kam sniew.

Ka Dorbar Shnong Moorap kynthei bad shynrang ryngkat ki placard ki la mih sha ka rally ban pyrshah ïaki kam runar jong ki lai ngut ki riew thrang snam kiba suba donkti ban pynïap dusmon ïa u Pynkhreh Surong uba na shnong Mynsngat haka 9 tarik une u bnai.

Pule Shuh | Lap iaka metiap uwei u briew, suba pyniap u para jong u I Love You bad u paralok

U Waheh Shnong ka Moorap u Stanly Ryngkhlem ula dawa naka bor jong ka aiñ ban set byndi shirta jingim bad sdien phasi ïa u Meban Talang bad Jimmy Kyndait namar lada ki lait ka buh jingma ïaka leit ka wan ki paidbah bad ka imlang sahlang.

Na ka liang uba haïing jong u Meban Talang bad u Jimmy Kyndait kila ong ba kum ka kur ki pynpaw ka jingsngewsih kaba khraw haduh katta katta bad kum ka ïing ka sem ki pynrem bad dawa naka ain ban set byndi shi jingim ne sdien ha u tyllai phasi.

Hashwa ka jingïalang ka la don ka jingïaid paidbah kaba sdang na Dong ïurim bad ïaid ter ter ïaka surok haduh ban da poi ha jaka pynlong jingïalang ha ïew Mynsngat. La iashimbynta da ki nonghikai, ki khynnah skul bapher ka thaiñ Mynsngat, ki kynhun sengbhalang, ki nongñiah kali da kaba rah lang ïaki kot rben ryngkat ki jingthoh pynrem bad pyrta ban set phatok shirta jingim ne sdien phasi ïaki lai ngut ki riew thrang snam.