Pakhang surok ki bor shnong ha Elaka Narpuh khlem buh por, ym pushe ka NHAI ban shna

Syllad | The Rising MeghalayaNovember 14, 2022

Hadien bala hap ban im iaka jingim kaba syrtok na ka jingsniew tasam ka surok la bun bun bnai bad hap ban iaid lyngba ka surok kaba khohruh khohram kaba bun da ki thliew ki syar bad ka um ktieh, kumta ki nongshong shnong kiba shah ktah kila mih syndet ban pakhang iaka surok bah National Highway 6 haka sngi Nyngkong.

Kane ka surok bah kala sniew shaba palat ka dei naduh Tonseng haduh Malidor bad la lap ba ka surok katba nang mih ki sngi kala bun da ki thliew ki syar bad ka ahor ki ktieh kaba la pynshitom iaka iaid ka ieng ki kali motor.

Bun bun sien kala wanrah iaka jingsahkut kali da ki bun bun kynta namar ba ki kali kim lah ban iaid baroh arliang ka surok bad hap ban kiar ha iaki maw kiba heh kiba paw haka surok bad ban kiar iaki thliew naduh ki kali heh haduh ki kali rit.

Ha kane ka jingpakhang surok la ialam da u Daïapherbha Lamare Convener, u Robi Suchiang Waheh shnong Umstain, u James Lamare Secretary Donaskur, Bhalang Lamurong Secretary Shnong Dona Umbluh, Francis Lamin ex waheh shnong Umkiang, Wansuk Shylla nongshong Lumshnong, Saman Phniaw Secretary Shnong Tongseng Narpuh.

Kine ki nongialam shnong kila pynpaw ka jingsngewkhia kaba jur halor kane ka jingsniew ka surok kaba la pynthud iaka iaid ka ieng ki paidbah kiba iaid lyngba ka Jylla ba kynthup iaka Mizoram, Assam bad Tripura nalor ki nongshong shnong ka Jylla kiba don ha shilynter ka surok bah.

La kyrshan ruh da ki kynhun sengbhalang kynthup ka JSU, JSM bad HITO kumjuh ki nongñiah kali kiba ïaid ba ïeng lyngba kane ka surok.

La pyllait tang iaki kali kit nongpang (ambulance) bad ki khynnah skul bad ki kali rit.

Haduh ba thoh iaka khubor, ka jingiakhih ka dang bteng bad ka NHAI kala leh bym pushe ban phah iaki tiar ki tar ban sdang iaka jingmaramot.

U Daiapherbha Lamare ula ong ba ki don tang katto katne kiba trei iaka surok ha Umkiang, hynrei ka jingsniew ka surok kala long palat iaka 60 KM naduh na Mynkre haduh Ratacherra.

“Kane ka jingsniew surok kala ktah iaki khynnah skul, ki briew kiba pang ba shitom namar khlieh la ka sngi la sahkut kali bad ngi shem shitom bha,” la ong u Daiapherbha bad bynrap ba naduh ba shimti ka NHAI iaka surok ka jingsniew ka surok ruh kala jur bha.

Haba ïakren bad ki nongïalam shnong ka thaiñ kynthup naduh ki Waheh Shnong, Secretary Shnong, ki nongñiah kali kiba shah ktah bha na kane ka jingsniew surok bad ki kynhun sengbhalang da kawei ka sur ki la rai ban bteng ïaka jingkhang ïa surok katba ka sorkar bad ka NHAI kam pat pynshna ïa kane ka surok.

Kumban shu pynkynmaw u Deputy Commissioner, East Jaintia Hills haka 20 tarik u Risaw ula ai da ka jingthoh bsha ka National Highway Authority ban bthah ban shna iaka surok hapoh 15 sngi, phewse ka NHAI kala leh bymsuidniew ia u DC bad haduh mynta kam don kino kino ki dak ki shin ba ka NHAI kan shna iaka surok.

U DC ula byrthen ruh ba lada ka NHAI kam shna iaka surok un pyntreikam ruh iaka Disaster Management Act ban shna iaka surok.

Haka shithi u katkum ka (No. DDMA-8/Pt/2021/355 Dated Khliehriat, the 20th October 2022 sha u Project Director, National Highways Authority of India PIU Shillong, ula bthah iaka NHAI ban pynjem iaka jingeh ban shna mardor iaka surok ha ki briew kiba tbit ban shna iaka surok.