Palat 1.92 lak ton u dewiong ba tih beain; lap ka ‘Drone Survey’ ha ki 4 District

Syllad | The Rising MeghalayaMarch 26, 2025

Haduh palat 1.92 lak metric ton u dewiong ba la tih beain la lapdien na ki saw tylli ki District ka Jylla katkum ka jingpynlong ia ka jingjurip kaba na suin ia kaba la leh lyngba ki drone bad ka kompeni jurip ka Garuda.

Ia kane la pynpaw da u Justice (retd) BP Katakey uba khlieh ia ka Committee hadien ba la pyniaid ia ka jingialang haka 25 tarik Lber.

Haba kren sha ki lad pathai khubor, u Katakey u la ong, “Ia ka kaiphod jong ka jingjurip kaba na suin ba la pynlong da ka Garuda la dep ban aiti bad katkum ka kaiphod, ha ki saw tylli ki district, East Jaintia Hills, South West Khasi Hills, West Khasi Hills bad South Garo Hills la shem ba palat 1.92 lakh metric ton u dewiong u dei u bym pat shim jingkhein.”

“Nga la bthah ia ki ban ai ia ki katto katne ki jingpynshai ia kaba nga khmih lynti ban ioh mynta lane lashai ka sngi. Kumta katkum ka jingpynpaw ka jong ki lait na u dewiong ba la dep shim jingkhein ki dang don bun u dewiong uba don hapoh ka 1 km pyllun.Kumta ruh ha kane ka jingialang mynta ka sngi nga la kyrpad ia ki Deputy Commissioner bad ia ki Superintendent of Police jong ki district bad ia ki Tnad ba dei khmih ba kin peitngor bha halor ka jingioh ia u dewiong lait na une u dewiong ba 1.92 lak ton,” u la ong.

U Katakey u la bynrap da kaba ong, “Haba pynshong nongrim lyngba kane ka kaiphod jong ka jingjurip, ngan sa aiti ia ka kaiphod jong nga sha ka Iingkashari Meghalaya High Court bad ngan sa pynpaw halor kaei ka jingsngew jong nga halor kane ka kaiphod ia kaba ngam lah ban iasam bad phi mynta tad hadien ba nga la aiti ia ka kaiphod bad tad lada ka High Court kan pyllait paidbah. Kumta ka jingshisha ka dang sah ba ka kaiphod na ka jingjurip ba la pynlong da ka Garuda, ki la lap sa palat 1.92 lak metric ton u dewiong ha ki sawtylli ki district ka Jylla Meghalaya.”

Haba kylli, u Katakey u la ong, “Uno uno u dewiong ba la lap lait na ki jaka buh ne depot jong ka CIL ki long kiba beain. Hadien ba ka NGT ka la khang bad ia kaba la pynskhem da ka iingkashari Supreme Court kaba la ong ba kam dei ban don shuh ka jingtih dewiong thliew khnai (rat hole mining) kaba mut ka dei ka kam tih beain lait noh lada la shah ia ka jingtih dewiong hapoh ka kyndon ka MMDR Act.”

Nalor kata u pyntip ruh da kaba ong, “La iathuh ha nga ha ka jingialang mynta ka sngi ba la dep ban ai ia ka prospective licence bad sa saw ngut ki la dep ioh kaba long baroh phra ngut bad na kine ki phra ngut laingut ki la dep ioh ia ka environmental clearance bad san ngut kin dang ioh ia ka environmental clearance. Napdeng kine ki laingut kiba la ioh ia ka environmental clearance ki la sdang ia ka jingtih dewiong.”