Palat 1900 ngut ki khynnah pule iaki ioh jinghikai haka Soft Skills na ka Aspire Meghalaya

Syllad | The Rising MeghalayaSeptember 2, 2022

Haduh 1917 ngut ki khynnah pule na ki 9 tylli ki skul bad kolej ha ki distrik bapher bapher hapoh ka jylla ki la ioh kheit ia u soh ka jingjop ha ka soft skills ne ka buit ban jop iaki jingkylli, jubab, ka rukom thoh tar bad ka jingkren khana bad nalor kiwei kiwei ki rukom trei bad talent identification ne ka jingiit iaka sap ka phong ki khynnah haka prokram jong ka Aspire Meghalaya.

Kane ka prokram kaba la pynlong haka taiew kaba la dep, ka dei kaba la kyrshan da ka Sorkar Meghalaya, lyngba ka tnat treikam jong ka Sports & Youth Affairs, ryngkat ka jingiasnohkti lem ka tnat Education, ka la pynlong ia ka prokram ‘Aspire Meghalaya’ ba la pyntreikam da ka AVENUES, Shillong.

Ka jingthmu jong kane ka prokram ka long ban pyntbit ia ki khynnah pule ha kiba bun ki liang shwa ba kin sdang wad kam wad jam, bad ruh ban pynshlur ia ki ha ka ban sei ia ki sap ki phong khnang ba yn ioh ban pyniasnoh ia ki bad ki skhim bapher bapher jong ka Sorkar Jylla.

U Jagdish Chelani (IAS), Deputy Commissioner, East Garo Hills District haba kren haba pynkut iaka prokram u la ong, “Ki khynnah samla jong ngi ki don ki sap kiba kyrpang haba nujor bad kiwei pat ki samla ka Ri jong ngi. Ki prokram kum ka Aspire Meghalaya ki lah ban iarap ia ki da kaba ai ia ka rynsan ban pynpaw ia la ki sap ki phong bad ruh ban pynshlur ia ki ban khmih lynti ia kaei kaei kaba bha tam na bynta ka lawei jong ki.” U la pynpaw ruh ia ka jingangnud jong u ban ia snoh kti lem bad ki skul ki kolej hapoh ka distrik ban ai jingiarap ia ki khynnah samla kiba thmu ban long IAS bad kumta ter ter.

Ka samla Ilarisa A. Lamin, ba pule ha ka Klas 9 ha St. Mary’s Higher Secondary School, Shillong, ka la ioh shim bynta ha kane ka prokram bad ka la ong kumne, “Ki jinghikai tynrai kum ka burom ka akor ki dei kiba ngi la tip lpa, hynrei nga sngewnguh ba lyngba jong kane ka prokram, nga la ioh ia ka lad ban puson kham bha ia ka jingkordor jong kine ki jinghikai khamtam haba ngi praktis ia ki ha ka jingim jong ngi ba man la ka sngi.” Ka la pynpaw ruh ia la ka jingsngewnguh sha ki trainer ba ai jinghikai, bad ba ka la ioh shibun ki jingmyntoi ha kaba iadei bad ka rukom kren rukom khana, rukom pyrkhat bad kiwei kiwei.

U Jonathan Shylla (MCS), ADC, East Jaintia Hills District, u la kren shaphang ki interview skill da kaba ai nuksa na ka jingim jong u ruh ha kaba iadei bad ka kam jong u. U la ong, “Ka rukom pule puthi jong ngi ka pynleit jingmut tang ha ka ban pass ia ki ekam, hynrei ngi klet ban ithuh bad pyndonkam ia ki sap tynrai ba ki khynnah samla jong ngi ki la don lpa, bad ban pynkhreh ia ki na bynta ka lawei jong ki.” U la ong shuh shuh ba nalor ka degree, donkam ruh ia ki leadership skill bad communication skill ban kiew shaphrang ha ki kam ki jam bad ha ka jingim ruh. “Ka Aspire Meghalaya ka ai kum kita ki jait jinghikai bad nga ngeit ba phi la ia ioh jingmyntoi shibun na ka bad ba phin pyndonkam tikna ia kine ki jinghikai ba phi la ioh,” u la kyntu ia ki khynnah.

Ka Aspire Meghalaya ka ai training ia ki khynnah pule ha ka jingshlur (Confidence), ka rukom pyrkhat shai ia ka lawei (Clarity), ka rukom pyniadei bad kren para briew (Communication) bad ka jinglah ban iaid shaphrang lyngba ki jingeh bad jingiakynduh bapher bapher (Emotional Resilience). Kawei na ki jinghikai ba kongsan ka ia dei bad ka Career Exploration, lane ban ai jingtip kumno ban sdang jied ia ki laiñ pule, ki kam ba iadei bad kita bad kumno ban neh bad kiew shaphrang ha la ki kam ki jam.

Ka Kong Simiroy Khongtiang, ka nongshna phlim ba pawnam na Jaiñtia Hills, ka la ai mynsiem ia ki khynnah ha Sutnga da kaba ong, “Nga la shah jop bunsien bad nga la leh shibun ki jingbakla ruh. Hynrei da ka jingangnud bad jingskhem jingmut, nga iai beh ia la ka thong. Ka jingim jong phi ka long kum ka jhad ia kaba phi hap ban pynper halor um da kaba skhem jingmut bad pynkhlain ialade, namar tang maphi hi ba lah ban ialam ia ka jhad jong phi sha ka jaka ba phi thmu ban leit.”

Kawei na ki jingthmu ba kongsan jong ka Aspire Meghalaya ka dei ban iarap khyllie ia ki sap ki phong kiba ha rieh jong ki khynnah samla ka jylla. Nalor ki workshop ba pynlong ha ki skul, ki don ruh ki rynsan ha kaba ki khynnah ki lah ban pyni ia ki sap ki phong jong ki. Ki skul ki don ka bynta kaba kongsan ha kaban jied ia ki nongmihkhmat sha ka distrik ha kaba ki don. Kin don ruh ki District Talent Committee ki ban jied pat ia ki nongmihkhmat jong kawei pa kawei ka distrik sha ka rynsan iakop pyni sap pyni phong jong ka jylla, ha kaba u paidbah jong ka jylla hi un ioh shim bynta ban jied ia ki nongjop ki ban yn sa ithuh paidbah kum kita ki ‘Aspire Meghalaya Stars’.

Ki 9 tylli ki jaka pule kiba la pyndep ia ka training jong ka Aspire Meghalaya ha kane ka taiew ba lah dep ki kynthup ia ka Williamnagar Government College bad Sacred Heart Higher Secondary School, Williamnagar ha East Garo Hills; Jaiñtia Eastern College, Khliehriat bad Sutnga Presbyterian Higher Secondary School ha East Jaiñtia Hills; St. Mary’s Higher Secondary School, Shillong bad St. Anthony’s Higher Secondary School, Pynursla ha East Khasi Hills; St. Francis D’Assisi College bad St. Peter’s Higher Secondary School ha Nongstoiñ, West Khasi Hills; bad Government Girls’ Higher Secondary School, Tura ha West Garo Hills.

Naduh ba ka sdang ha u bnai Jymmang mynta u snem, ka Aspire Meghalaya prokram ka la lah sam ia ki jinghikai sha palat 9,000 ngut ki khynnah pule ha jan 45 tylli ki jaka pule ha baroh 12 tylli ki distrik, bad palat 160 tylli ki sap ki phong la lah ban ithuh. Ka prokram ka dang iaid shaphrang ha ka jingthmu jong ka ban ai jinghikai sa ia palat 3,000 ngut ki khynnah pule ha ki bnai ki ban wan.