Palat 200 tylli ki dukan bym don trading license ha Lad Rymbai: HYC Jaiñtia Hills District

Syllad | The Rising MeghalayaMay 10, 2019

JOWAI: Ka Hynñiewtrep Youth Council (HYC) Jaiñtia Hill District kala pynlong ka jingkhynra ïaki dukan bapher bapher ha Ladrymbai East Jaiñtia Hills haka sngi Thohdieng bad kala lap da ki spah spah tylli ki dukan ki bym don kot don sla- ka Trading License ban khaii pateng ha kane ka thaiñ bad don ruh ki bym shym la pynthymmai ïaki kot ki sla ban buh ïaki jait dukan bapher bapher.

Ha kane ka jingkhyra ka HYC la ïadonlang ki nongtrei jong ka Jaiñtia Hills Autonomous District Council (JHADC) bad na ka HYC la ïalam da u President u Mewat Suchiang, General Secretary Roaming Lamare bad kiwei kiwei ki dkhot ka HYC.

Ka HYC kala lap ba bun tylli ki dukan kila khang khyrdep lypa bad ka HYC ka suba jur ba kine ki dukan kila tip ïaka jingwan khynra  ka jong ki namar ba kila dep pyntip shaka bor jong ka JHADC bad ki Waheh Shnong katei ka shnong.

Ka HYC ka la lap kumba 800 tam tylli ki dukan kiba khang lypa bad tang 518 tylli eiei ki dukan kiba don Trading License, katba 300 tylli ki dukan bar jylla ki khlem pynthymmai ïaki kot ki sla bad 200 tam ki dukan ki bym don satia ïaki kot ki sla ban khaii pateng bad ban buh iaki dukan ha katei ka shnong kaba jyllei bha ki dukan bar jylla.

Hashuwa ban sdang ka JHADC bad HYC ban khynra ïaki dukan  kila don ki nongialam shnong bad ki pulit kiba wan ban tohkit, hynrei ba ki nongialam ka HYC kila pynshai ïaka jingthmu ka jong ki abd kane ka jingkhynra trading license kala iaid beit iaid ryntih.

Ka HYC ka kyntu iaka JHADC khamtam ïaka tnad ba dei peit iaka khaïi pateng ki bar jylla ba kin pynlong ka jingkhynra trading license bad labour licence man la ka por ban tem ïaka jingkhaïi beain ki bar jylla. La kyntu ruh ïa ki Dorbar Shong ha baroh kawei ka Rilum Jaintia ban khanglad ïaki bar jylla ban khaii pateng khamtam ïa kito kibym don kot don sla ba kiba khlem ioh jingbit.