Palat 2000 kiba im bad u khniang HIV ha Jaiñtia, la plie ïaka ART ha Civil Ialong

Syllad | The Rising MeghalayaNovember 1, 2019

JOWAI: Ka jingangnud jong ki doktor ban ïoh ïaka jaka sumar ïaki nongpang HIV kala urlong bad mynta lah ban sumar ïa ki nongpang kiba im bad u jingpang HIV ha Jowai Civil Hosipital, Ialong bad kim donkam shu ban leit phah sumar ïalade shaduh sha sor Shillong hadien bala plie ïaka Anti-Retroviral Therapy (ART) ha Jowai Civil Hospital Ialong haka sngi Palei.

Ha Rilum Jaiñtia katkum ka kaiphod na I Kong I. Wriah, Assistant Director Care Support Treatment, Meghalaya Aids Control Society (MACS) kane ka jingpang HIV ha rilum Jaintia kala kynrei bha bad ka jingdon ki briew kiba im bad ka jingpang HIV kala nang nang kiew.

I Kong Wriah ila ïathuh ïa kane haka jingialang kaba long ha Conference Hall u Deputy Commissioner, West Jaiñtia Hills halor ki jingiarap bad ki lad jingiada ïaki briew kiba pang HIV. Ïa kane ka jingialang la pynlong da MSNP+ ha ryngkat ka bor synshar district bad kaba kyrshan da ka Meghalaya Aids Control Society (MACS).

Katkum ka jingkhein ka Rilum Jaiñtia kaba kynthup ïaka East bad West Jaiñtia Hills ki wan haka kyrdan kaba ar bad ba lai ha Jylla Meghalaya hadien ha East Khasi Hills District kaba wan haka kyrdan kaba nyngkong.

Ka East Jaintia Hills ki briew kiba im bad kane ka jingpang ki don haduh 1045 ngut, ka West Jaiñtia Hills 1233 ngut kiba kit ïa une u jingpang. Ka East Khasi Hills haduh 1557.  Baroh kine ki kit ia kane ka jingpang la dep register hapoh ka ART Shillong.

Ka Dr J Lakiang bad Dr. KC Ajar ki District Medical & Health Officer jong ka East bad West Jaintia Hills haba kren haka jingplie iaka ART ha Civil Hospital Ialong, kila ong ba ka jingplie ïa kane ka ART kan long ka jingkyrkhu kaba khraw ïa ki nongpang ba kin ïoh ka jingsumar bad ka jingsyllok kaba paka na kane ka ART na ki doktor bad ki nurse kiba dei peit ia kane ka jingpang.

U Dr. Ajar ula ong ba ka imlang sahlang kam dei ban pynïapher ne niewbeiñ ïa ki briew kiba pang iaka jingpang HIV, hynrei ban iarap da ka jingieit ba kin im ka jingim kaba bha kaba miat.

Kiwei kiwei kiba kren ki kynthup ïaka ka Dr. A Lyngdoh Deputy Director STI, MACS (Meghalaya Aids Control Society), Shillong, ka kong I. Wriah, Assistant Director CST, MACS. Dr. A. Hinge, Nodal Officer ART Centre, Jowai Civil Hospital bad kiwei kiwei.

Ka kong I Wriah kala iathuh ba kane ka ART kan ai ka jingsumar ei ïa kiba kit iaka jingpang HIV bad ka jingïasyllok.

Kane ka jingpang kala kynrei bha ha Rilum Jaiñtia kadei na ka jingshongkha awria bad haba nujor na ki jingkhein ka duna bha kiba ngat ha kane ka jingpang naka injek ia u drok haka Jylla.