Palat 3 snem khlem pyllait iaka bill bylla trei 100 sngi, beh ram ki trai dukan

Syllad | The Rising MeghalayaMay 1, 2022

Watla ka sorkar MDA kala pynheh iaka tyngam ba kala kiew arted ha baroh ki kiliang, phewse kiba bun ki Village Employment Council (VEC) kila pynpaw ba kila duh iaka jingshaniah iaka sorkar MDA namar ba mynta la palat 3 snem ka bill trei bylla 100 sngi kaba la tip kum ka Mahatma Gandhi National Rural Employment Guarantee Scheme (MGNREGS) kala thud ha kiba bun ki shnong ha West Jaintia Hills.

Ia ki VEC la thaw na ka bynta ban pyniaid shakhmat iaka MGNREGS ha ki jaka nongkyndong bad ban pynioh jingtrei ym duna 100 sngi kawei ka longïing ban kyntiew iaka ioh ka kot katkum ki kyndon jong ka MGNREGS. Baroh ki longïing ki don ka hok ban pynrung kyrteng ban ioh iaka jobcard ne ban trei bylla 100 sngi.

Ha Jylla Meghalaya ia kane ka skim la bei pisa 90-100 da ka Sorkar Pdeng bad ia kane ka skim la pyniaid beit da ka tnad Community & Rural Development sha ki district bad na ophis BDO bad la pyllait sha ki VEC ia ka bai tiar bai tar, katba iaka bai bylla sngi la thep beit ha ki nongioh myntoi ne job card holder.

Kane ka jingbym ioh bai tiar ne material cost haki lai snem tam na kane ka skim bylla 100 sngi kala wanrah mawjynthud iaka rukom pyntreikam ia kane ka skhim wat haki shnong kiba la iaid shakhmat ban pyntreikam ha kane ka skim bylla 100 sngi.

Ki shnong kiba iaid shakhmat ban pyntrei ia kane ka skim kum ka Mukhnang, Umjalisiaw, Madanrtiang, Mukoh, Khonsaro, Lapangap, Namdong bad kiwei kiwei ki shnong kiba hap ha Nartiang Constituency kiba hap ha Thadlaskein C&RD Block kila shah ktah bha ha kane ka jingbym pyllait bill ne bai tiar ka sorkar sha ki VEC.

U general secretary KSU Lapangap unit, Saikial Sumer ula ong “Haka por ba iaid beit bha kane ka skim ym don skim kam pynroi hakhmat kane ka skim 100 sngi. Ka skim MDC, MLA ka dei kaba shitroh, hyrnei naduh bala thud ka jingwan tuid ka pisa bai material ne bai tiar baroh ki VEC kila shah ktah ban pyniaid shakhmat ia kane ka skim.”

“Mynshuwa ki trai dukan mar sien ong ba shim tiar na ka 100 sngi, wut wut ki pynbiang iaka jingdonkam, mynta pat kila sdang ban thlia namar bala thud ka rukom wan ka pisa,” la ong u Saikial bad ki trai dukan ki da pynkynmaw ban siew iaka bill ba sah ne ong “Pyndep ia kaba sah”.

“Lada ka sorkar ba mynta kam lah ban pyllait iaka bill, ka jingdum ka ap iaki shnong ki thaw baroh ha ki thain nongkyndong bad kan ym slem ba ka jingpyntrei ia kane ka skim ka shu long kumba long kiwei pat ki skim sorkar bad ka roi ka par ki shnong nongkyndong kan long kumba julong,” la kren bynniaw u Saikial bad buh jingkylli iaka sorkar hato ia kane ka skim yn pyllait bill kumba leh ia kiwei ki bill sorkar ban siew shi sien 4 bnai ne quarter system?

Ula ban jur iaka sorkar ban shimkhia ban pynbeit iaki jyrwit jyrwat kane ka skim khnang ba kin shnong ha ki thain nongkyndong kim nym duh jingmyntoi naduh ban tei iaki jingtei imlang sahlang bad kumjuh ban pynbha pynmiat iaki khlaw ki btab bad ki jaka rep.