Palat 30,000 ngut kiba shah ktah haka jingshlei um ha Garo Hills, leit jngoh u CM ka jylla Meghalaya

Syllad | The Rising MeghalayaJuly 6, 2024

U Myntri Rangbah ka jylla u Conrad K Sangma ha ka 5 tarik Naitung u la leit jngoh ia ki jaka ba la shah ktah ha ka jingshlei um jong ka plain belt jong ka Garo Hills.

Ki jaka ba shah ktah ki kynthup iaka Silkata, ka Namabila bad ka Haripur ki dei ki katto katne ki jaka kiba la shah ktah jur bha ha West Garo Hills. Ha kane ka jingshlei um palat 30,000 ngut ki briew ki la shah pynkynriah jaka.

Kane ka jingshlei um kala jia na ka jingkiew ka um haka Wah Jinjiram kaba don harud kitei ki shnong. kane ka Wah ka mih na ki bynta jongka Goalpara District jong ka Assam bad kala iaid lyngba ka Goalpara bad South Salmara district jong ka Assam bad kala rung shapoh West Garo Hills bad nangne pat kala leit pyniasoh bad ka wah Brahmaputra kaba heh bad iar ka par.

U Conrad ula ong  ba “Ka don ka jingshlei um kaba jur bha mynta bad ka um ka la jan 5-6 phut palat ia kaba ju long bad katkum ka jingkhein kaba u a la ioh haduh kumba 30,000 tylli ki longïing ki la shah ktah ha baroh kine ki jaka ha katei ka thain”

U myntri rangbah u la pynpaw iaka jingsngewnguh iaka bor synshar district kaba la shimkhia stet bha bad ka la ai jingïarap kyllum bad jaka rieh tngen sha ki longïing kiba shah ktah.

Katkum ka jingong jong u, kam shym la don kano kano ka jingduh mynsiem haduh mynta.

“Baroh ki nongshong shnong la pynkynriah bad buh ha ki jaka ri khunswet bad ki jaka ba shngain bad ngin ap bad peit kumno kiei kiei kin iaid bad hangno hangno ba don kano kano ka jait jingma ne jinglong jingman kaba ngi lap ba uno uno u lah ban shah ktah, ngi don ha ka jingpeitngor bad ngin pynthikna ba ki briew shimet ki shah pynkynriah noh kloi naduh hangta bad la wanrah sha ka jaka kaba shngain,”ong u Conrad

“Kumta ngin dang buddien ïa ka jinglong jingman hynrei kumba nga la ong kane ka dei ka jingjia ba sngewsih ha ka mariang bad baroh ki jingkyrshan kiba donkam na ka sorkar bad ka bor synshar la ai sha ki longïing kiba shah ktah,” bynrap biang u CM.