Palat 400 ngut wan iashimbynta haka VDP Rally ha Jowai

Syllad | The Rising MeghalayaMay 19, 2023

U Deputy Commissioner West Jaintia Hills District, Bah BS Sohliya ula ong ba Village Defence Party (VDP) ne ki shipai shnong ki don ka bynta kaba kongsan ban pynneh iaka shongsuk shongsain ka shnong ka thaw.

U DC haba kren haka jingialang VDP Rally jong ki VDP ha West Jaintia Hills haka sngi Thohdieng, ula ong ba ka shongsuk shongsain kan wan dei tang lyngba ka jingiatreilang ki pulit bad ki VDP kiba long peitngor hapoh shnong ban tem ia kino kino ki kam sniew bad kiba ktah iaka imlang ka sahlang.

Kumta, ula khot iaka jingiatreilang jong ki Pulit bad ki VDP bad ula iaroh iaka tnad pulit kaba la pynlong ia kane ka rally ban iatei bad iakren iaka jingbha jingmiat ki VDP.

Ha kane ka rally VDP la wan ban iashimbynta da ki palat 400 ngut ki VDP kynthup shynrang bad kynthei na ki 272 tylli ki shnong kiba hap haki saw tylli ki Police Station- ka Jowai Police Station, Amlarem Police Station, Dawki Police Station bad Nartiang Police Station.

Ia kane ka rally la pynlong da ka ophis u Superintendent of Police, West Jaintia Hills ha indoor hall ka Chutwakhu Jowai.

Ka jingthmu jong kane ka rally VDP ka dei kum shibynta ban jingkynduh lang ban ioh iaka jingiatreilang hadpeng ki VDP bad ki Pulit ban tem iaki kam sniew ha ki shnong ki thaw.

U Superintendent of Police u Ma Chemphang Syrti haka jingkren ula khot la wer ïa baroh ki VDP ba kin ïakhun ban rat dyngkhong iaki kam sniew bad ki kam beaiñ bad lada ki donkam jingïarap na ki pulit kidei ban pyntip mar mar sha ki Police Station ym ban shim ïaka aiñ haka kti.

Ula kren ruh shaphang u drug, u jait jingdih pynbuaid uba sniew bad shisien bala ngop la eh ban pyndkut iaka kynjri bad bun ki samla kila ngop ha une u jingdih. Ula kyntu ïaki kmie ki kpa ban peitthuh bha iaki khun ki kti bad ban sneng kraw ïaki khun ki kti ban lait na u drok.

U SP ula kren ruh ha kaba ïadei bad ka kam pulit bad ula kyntu ïaki khun samla kiba don jingthmu ban rung shaka kam pulit, ban long kiba la pynkhreh khlem da donkam ban ap haduh kata ka khyllipmat ban pynmih ïaka advertisement, hynrei long kiba la pynkhreh lypa naduh mynta ban khie mareh step bad ban pule ïaki kot.

Ula kyntu ruh ïaki shnong ki bym pat don VDP ba kin thaw noh bad ban pynrung dkhot ialade da kaba ïatreilang bad ki pulit.

Ha kane ka rally, kala don ruh ka jingphylliew jingmut ha kaba iadei bad ka jingtreikam ka VDP. La pynshong shit ïaka jingkynduhlang da ki sur jingrwai na ka kynhun jong ka Meghalaya Police Cultural Troops.

Iaka jingïalang la pynïaid da u GAL Marshillong MPS, SDPO Amlarem, haka jingiadonlang u Additional SP Ma VDS Rymbai, MPS bad kiwei kiwei ki heh pulit ka District.