Palat 7 hajar ngut ki ban iashim bynta ha ka 3rd Sohra International Half Marathon

Syllad | The Rising MeghalayaSeptember 9, 2024

Shi sngi shwa ban kut ka jingpdiang kyrteng ia ki nongwan iashim bynta ha ka “3rd Sohra International Half Marathon 2024,” ka don ka khbubor kaba sngewtynnad, kata ka long namar haduh mynta ki nongpyniaid ki la ioh pdiang lypa haduh palat 7 hajar ngut ki nongiashim bynta.

Kine ki nongiashim bynta kiba la dep ban ai kyrteng ki kynthup ruh ia ki katto katne ki nongiamareh kiba dei na shabar jong ka ri kumjuh na shabar ka jylla nalor kiba napoh la ka jong ka jylla.

Ia kane ka jingiakob mareh yn pynlong ha ka 21 tarik mynta u bnai Nailur 2024. Ia kane la pynpaw da u Secretary ka Meghalaya Athletic Association u Bah Finely L Pariat ryngkat u Working President ka Meghalaya State Olympic Association u Bah John F Kharshiing bad u Director ka Tnat Sports & Youth Affairs ka Sorkar Jylla u DD Shira.

Na ka liang u Bah Finely u pyntip ba tang na ka bynta ka jingiakob mareh ‘Run For Fun,’ ki nongiashim bynta ki la kynjoh sha ka 5583 ngut, katba ki nongiamareh kiba iakhun ban jop ia ka song pisa, katta ka jingiamareh kaba 21K bad ka 10K ki long 2153 ngut bad haba khein kyllum ki nongiashim bynta kiba la ai kyrteng ki la kynjoh sha ka 7736 ngut.