Palat shisnem tang uwei u ophisar EAC ha East Jaiñtia Hills

Syllad | The Rising MeghalayaMarch 11, 2020

Palat shisnem tam ka East Jaiñtia Hills District kala mad ïaka jingeh namar ba uwei u EAC ne magistor u hap ban peit ne pyniaid ïaki ar tylli ki Block Ophis, kata ka Saipung bad Khliehriat C&RD Block nalor ka kam ha DC ophis bad ka ïingbishar ha Khliehriat.

Ka Khliehriat Block Congress Committee (KBCC) hapoh ka jingialam u President u Deibormi Syad bad Working President u Piwell Shylla haka 10 tarik mynta u bnai ki la leit iakynduh iaka Kong Ampareen Lyngdoh MLA ka East Shillong Constituency ban ai dorkhat halor ka jingduna ki Extra Assistant Commissioner (EAC) bad bym don u Block Development Officer (BDO) ba pura ha artylli ki Block ophis ba kynthup iaka Khliehriat C&RD bad Saipung C&RD.

Ka Khliehriat Block Congress Committee kala pynpaw ka jingsngewkhia halor ka jingshah ktah ki paidbah ka thain East Jaiñtia naka ka jingduna ki ophisar EAC haka District bad kim lah satia ban pyndep ïaki kam ki jam jong haka por kaba biang.

Kane ka district kaba don 206 tylli ki shnong bad namar kane ka jingduna ophisar EAC bad une u ophisar ba mynta ruh u hap ban beh na kawei ka ophis sha kawei pat ban pyndep ïala ka kamram, kaba la ktah shikatdeieh ïaki paidbah na kylleng ki shnong ha kane ka district.

Uwei pat u samla u Kynjaimon Amse ula ujor sha u Chief Secretary ka Jylla ba mynta palat shi snem naduh bala pynkynriah ïaki ophisar EAC haduh mynta ym shym la thung ha ka jaka jong ki bad sah sa tang uwei u ophisar EAC, uba hap ban peit bun tylli ki kam. kaba kynthup BDO office Saipung bad Khliehriat nalor ka kam bishar ha iingbishar ha Khliehriat.