Palat T.22 klur mang ka Sorkar ban pynlut ha ka elekshon District Council, yn wanrah shuh ki bor pahara

Syllad | The Rising MeghalayaFebruary 5, 2025

Ka Sorkar Jylla kala mang palat T.22 klur ban pynlut na ka bynta ban pyniaid ia ka elekshon sha ka Khasi Hills Autonomous District Council (KHADC) bad Jaintia Hills Autonomous District Council (JHADC), ka ban long ha ka 21 tarik Rymphang.

Haba pyntip ia kane ha ka 4 tarik Rymphang, u Commissioner & Secretary ka Tnad District Council Affairs (DCA) u Bah Cyril Diengdoh u la ong, “Ka pisa ba la mang ban pynlut na ka bynta baroh ki artylli ki ADC ka long T.22 klur.”

U la ong ba ka jingpynlut ka iapher na kawei ka district sha kawei pat da kaba bynrap ba ki Deputy Commissioner ki la pynbiang ia ki jingkhein jingdiah ha kaba ia ka pisa la pyllait sha ki katkum ka jingdonkam ka jong ki.

Da kaba pynpaw ba ka Tnad ka la dep ban pynbang ia baroh ki jingdonkam na ka bynta kane ka elekshon ADC, u Bah Cyril u la ong ba u Chief Secretary u Bah DP Wahlang ruh u la dep ban lum ia ka jingialang bishar kam ha ka 3 tarik Rymphang bad baroh ki Deputy Commissioner bad ki Sub Divisional Officer.

“Baroh ki la pynpaw ia ka jingsngew skhem ba ki la long kiba la pynkhreh nadong shadong na ka bynta kane ka elekshon,” u la bynrap.

Halor ka jingpynbiang ia ki bor pahara, u Commissioner & Secretary u la pyntip ba yn sa wanrah shuh shuh ia ki bor pulit na Western Range (Garo Hills) khnang ban pynkhlain ia ki bor pahara na ka bynta kane ka elekshon ha Rilum Khasi bad Jaintia.

“Kane ka jingpynkhreh ka la iaid shakhmat bad ki DC ki la iatreilang bad ki SP jong ki district. Ngin sa ioh ia ki jingtip ba kham bniah na ki pulit ba haduh katno ki bor pulit ki la wanrah na ka Western Range,” u la ong

Ha kaba iadei bad ka jingdon ki Polling Station kiba don jingma bad ba lah ban mih ki jingklumar, u Bah Cyril u la ong ba ki DC ki dang bteng ban lum jingtip bad bishar bniah halor kane.

Watla katta u la ong ba ka sorkar Jylla kam shym la iohi ne khmih lynti ba kan don kano kano ka jingpynthud ne jingklumar ha kane ka elekshon ADC. U la ong ruh ba haduh mynta ka Tnad kam pat shym la ioh pdiang satia ia kano kano ka jingujor ha kaba iadei bad ka jingpynkhein ia ka Model Code of Conduct (MCC).