Pan jingiarap pisa ka Sorkar T.600 klur ban pynjanai ia ka jingtreikam ka tnad Social Welfare

Syllad | The Rising MeghalayaOctober 15, 2024

Ka Sorkar Meghalaya ka la pan ia ka jingiarap pisa kaba T.600 klur na ka Sorkar Pdeng khnang ban kyntiew bad pynjani ia ka jingtreikam jong ka Tnad Social Welfare ha baroh ki liang.

Haba pyntip ia kane ha ka 14 tarik u Risaw, u Myntri ka Tnad Social Welfare u Bah Paul Lyngdoh u la ong ba u la pynlong ia ka jingialang bishar bniah halor ki jingtreikam bad ka jingdon pisa jong ka Directorate lem bad ki jingtreikam ki jong ka ia kiba donkam ban khmih bad shim da ka sorkar Jylla.

“Ki don katto katne ki mat ia kiba hap ban iakren hapoh ka Cabinet, bad ki don ki kam kiba hap ban iamir jingmut bad ki san tylli ki Ministry ka Sorkar Pdeng kiba iadei bad kane ka Tnad treikam jong ngi hangne ha Meghalaya,” u la ong.

“Kiwei pat ki jingdonkam kin kynthup ia ka jingpynioh pisa shuh shuh na ka Ministry. Ngi la buh ka jingtyrwa ia ka song jingiarap pisa kab T.600 klur. Ki don ruh ki jingdonkam ia ngi ban pynbiang ia ka rukom treikam jong ki nongtrei hangne ha Jylla. Kiba bun ki la trei kum ki nongtrei kontrak bad ba ki la hap ban trei shitom shibun.Kito kiba trei miet ki hap ban shong miet. Kumta ngin pyrshang ban pynbiang na ka bynta ki jingdonkam jong ki khnang ba kin lah ban ai ka jingshakri kaba kham bha ha ki jingtreikam,” bynrap u Bah Paul.

Nalor kata une u Myntri u la shong ruh ia ka jingialang bishar kam ha kaba iadei bad ka jingtreikam jong ka Women and Childline Helpline ha ka ophis jong ka Directorate of Social Welfare.

“Kumba phi iohi da lade, ngi don bun ki khynnah samla kynthei bad shynrang kiba la tbit bha shaphang ka technology bad kiba la pyniaid ia ki jingtreikam man la ka sngi, kata ki case kiba iadei bad ki jingujor ha ki Child Helpline bad Women Helpline ha kaba ki don laingut ki nongtrei kiba khmih bad ia bujli kam na ka bynta man ka phra kynta khlem sangeh,” u la ong.

“Nga sngewkmen ruh ban iohi ia ka jingtreikam kaba seisoh jong ka Child Helpline cell. Nga skahi ba ka jingseisoh ka long haduh kumba 90% ki case ba la pynbeit nalor ka jing ia baroh ki jingtip kiba wan na ki district bapher bapher ha ka dashboard baroh 24 kynta bad kine ki jingtip mynta yn pynrung ruh hapoh ka ophis jong nga ha Secretariat,” bynrap u Bah Paul.

Da kaba pynksan ba ym baroh kiei kiei kiba la jia ha Meghalaya ki long kiba sniew, u Myntri u la ong, “Ki don shibun ki jinglong ba bha bha. Ki don shibun ki samla shynrang bad kynthei kiba don ka jingangnud kaba khraw ban aijingshakri ia ka imlang ka sahlang, bad ka khana kaba ym sngew lah ngeit haba ngi iohsngew ba ki kynthei kiba iakynduh ia ka jingshah thombor ha la ki iing ki sem ki la ioh mardor ia ka jingiarap, jingkyrshan bad ka jingtuklar ka jong ngi kum ka Tnad.”