Pan jingkyrshan ka sorkar jylla na ka sorkar pdeng ban pynkha sa palat 1500 tylli ki anganwadi centre

Syllad | The Rising MeghalayaSeptember 20, 2023

Ka sorkar Meghalaya mynta ka sngi Balang ka la pan ia ka jingkyrshan pisa jong ka sorkar pdeng na ka bynta ban wanrah bad pynkha sa palat 1500 tylli ki anganwadi centre ha ki shnong ki thaw hapoh ka jylla.

Haba jubab ia ka jingkylli ba la wanrah da ka MLA ka AITC na Ampati ka Miani D Shira hapoh Assembly, u Myntri ba dei khmih ia ka Tnat  Social Welfare u Bah Paul Lyngdoh u la ong, “Ngi la dep ban phah ia ka jingtyrwa sha ka Ministry of Women and Child Development na ka bynta ban kdup lut ia baroh ki shnong ki bym pat don ia ki anganwadi centre hapoh kine ki shi snem ar snem ki ban wan.”

Nalor kata u la ong ruh ba ki 1500 tylli ki shnong ki thaw ki bym pat don ia kine ki centre mynta ki la don hapdeng ka jingpynbeit hapoh ka Early Childhood Development Programme. U la ong ruh ba khyndai tylli ki aplikeshon la ioh pdiang tang napoh East Khasi Hills ban buh noh ia ki main Anganwadi Centre bad 27 tylli na ka bynta  ki mini anganwadi centre.

Shuh shuh une u Myntri u la pyntip ruh ba un sa pynlong ruh ka jingialang bishar bniah ha kaba iadei bad ki  anganwadi centre kiba la dep don ha baroh kawei ka jylla ha une u bnai Risaw u ban wan. Nalor kata u la pynthikna ruh ban khmih halor ki jingeh jong baroh ki dkhot ha kaba iadei bad kine ki centre ha ka jingialang pyrkhat kam ka ban wan.

Katba na ka liang u MLA ka Congress napoh Mawhati, u  Bah Charles Marngar u kwah ban tip ba kaei kaba jia ia ki rice cooker ba ai sha ki anganwadi centre khlem ka jingdon bording elektrik katba u MLA ka Umsning u Celestine Lyngdoh ula kyrpad ia ka jingdonkam ban pynthikna ia ka jingpynpoi umbam umdih sha ki centre, bad u MLA ka Amlarem u Bah Lahkmen Rymbui ula pynpaw halor ka jingdonkam ban don ka jingiatreilang hapdeng ka Tnat Social Welfare bad ka Tnat ka Koit ka Khiah lem bad ka Tnat Pule Puthi na ka bynta ka jingbit jingbiang bad ka jingheh jingsan jong ki khynnah hapoh ka jylla.