Pan jingkyrshan u CM na u Amit Shah ban pynlong ia ka National Games ha u 2027

U Myntri Rangbah ka Jylla u Conrad K Sangma ula pan ia ka jingkyrshan lem jong u Myntri ka Tnad kam Pohiing jong ka Ri u Amit Shah na ka bynta ka Meghalaya khnang ba kan lah ban pynlong ia ka National Games ka ban long ha u snem 2027.
Haba kren sha ki lad pathai khubor ha ka 22 tarik Kyllalyngkot, u Conrad u la ong, “Na ka liang ka jong ngi, ngi la tyrwa ba ngi kwah ban pynlong ia ka National Games ha u 2027, bad na ka bynta kane, nga la pyrkhat ba ngan iakynduh bad iakren ia u Myntri kam pohiing ruh. U Shah u la ai ia ka jubab kaba sngewtynnad. U don ia ka jingkwah ba ka thain Shatei Lammihngi ka dei hok ban ioh pynlong ia ka National Games hadien bun bun snem, bad kaba khatduh eh nga tharai ka dei ha u 2007 ne 2008 ha Assam.”
“Hooid, ngi la pan ia ka jingkyrshan lem ka jong u khnang ba lah ban pynurlong ia kane ka jingthmu bad ban phah ia ki jingai jngmut lane ka jingkyrshan na ka liang jon u sha ka IOA ha kaba u la kular ha ngi ia ka jingkyrshan kaba pura bad ba un shim ia baroh ki lad ki lynti na ka bynta ban ioh pynlong ia ka National Games ha kane ka Jylla Meghalaya,” u la bynrap.
Nalor kata u Myntri Rangbah u pyntip ruh ba dang shen u la shong jingialang bad ka Chairperson jong ka Indian Olympic Association (IOA) ka PT Usha. “Ha kane ka jingialang ngi la iakren ha kaba iadei bad ka National Games ban pynlong da ka Meghalaya ha u snem 2027. Mynta ka long ha Uttarakhand bad ka ban wan kan sa long biang ha u 2027,” u la ong.


Leave a Reply