Pan jingmut ka Committee na ki kynhun ba trei ha ki kam jngohkai ban pynbeit ia ki jingeh jong ki

Syllad | The Rising MeghalayaOctober 16, 2024

Ka Committee ba la thung da ka Sorkar ia kaba la khlieh da u Director ka Tnad Tourism u Bah Cyril Diengdoh ha ka 15 tarik u Risaw ka la kyntu ia ki kynhun kiba don bynta ha ki kam jngohkai ba kin phah ia ki jingai jingmut lyngba ki jingthoh hashwa ban lah ban shim ia ka rai na ka bynta ban pynbeit ia ki jingeh ki jong ki.

Ka Committee ka la rai ruh ban pynlong la ka jong ka jingialang bad ka All Khasi Meghalaya Tourist Taxis Association (AKMTTA) hadien ba ki la kyntait ban wan iashim bynta ha ka jingialang kaba nyngkong kaba la long ha ka 15 tarik Risaw hapoh State Convention Centre.

Ha kane ka jingialang la wan iashim bynta da ki kynhun bapher bapher kaba kynthup ia ki Seng jong ki nongniah taxi kamai, ki tour operator, ki trai hotel bad kiwei kiwei.

Haba kren sha ki lad pathai khubor hadien ka jingialang u Bah Cyril u la ong, “Kane ka dei ka jingialang kaba nyngkong jong ka Committee ba la thaw da ka sorkar ban khmih bad pynbeit ia ki jingeh jong kine ki kynhun seng. Ngi la khot sngewbha ia baroh ki kynhun kiba trei ha ki kam jngohkai pyrthei. Baroh ki la ia wan bad ai ia la ki jong ki jingmut. Ngi la kyntu ia ki ba kin ai ia ki jingmut ki jong ki lyngba ki jingthoh.”

U la pyntip ruh ba ki laitylli ki seng jong ki Tourist Taxi kiba kynthup ia ka Meghalaya Tourist Transporters Association, All Shillong Tourist Taxi Drivers United Organization bad ka Khasi Hills Tourist Taxi Association ki la wan iashim bynta ha kane ka jingialang, hynrei ka AKMTTA kam shym la wan poi satia.

“Nga tharai ka AKMTTA ka kwah ban shong la ka jong ka jingialang. Ngin sa leh ia kata. Ngin sa khot ia kiwei ruh. Kam don jingeh ia kata” ula ong haba bynrap ba ka Committee kan sa pynmih shen ia ka jingtip halor kane ka kam.

Haba kylli une u Director ka Tnad Tourism u la ong ba ka Committee ka dang bishar bniah ia baroh ki jingai jingmut ba la ai da ki kynhun bapher bapher bad kawei na kine ka long halor ka jingpyndonkam ia ki kali shimet kum ki taxi.

Nalor kata u la ong ruh, “Ngi dang ap ia ki jingai jingmut bad ngin sa shim ia ka rai halor kane ka kam.”