Pan jingshai u Justice Katakey halor ka kaiphod aerial survey ia u dewiong ba lum thup

Syllad | The Rising MeghalayaMarch 25, 2025

U Justice (retd) BP Katakey uba khlieh ia ka committee ba la thung da ka iingkashari Meghalaya High Court haka 24 tarik Lber u la pan jingshai halor ka kaiphod jong ka jingjurip kaba na suin (aerial survey) ba la pynlong hapoh ka shi kilomitar sawdong ia ki jaka lum thup ia u dewiong ba la lap ha ki sawtylli ki District ka East Jaintia Hills, West Khasi Hills, South West Khasi Hills bad South Garo Hills.

Haba kren sha ki lad pathai khubor, u Katakey u la ong ba ia ki artylli ki mat la iakren bad iasyllok ha ka jingialang kaba la long hynne ka sngi Nyngkong.

“Nga la bthah ia ka sorkar ba kan pynlong ia ka jingjurip kaba na suin hapoh ka shi kilomitar sawdong ia ki jaka ba la lum thup ia u dewiong ha ki sawtylli ki district. Na ka liang ka sorkar ha u snem 2019 ka la aiti ia ka affidavit hapoh ka Iingkashari Supreme Court kaba kdew ia ki jaka ba la lum thup ia u dewiong. Da kaba pynshong nongrim halor kane, ngi la bthah ban pynlong jingjurip lait noh ia u dewiong ba la dep ban shim jingkhein. Ngi kwah ban iohi ba hapoh jong kane ka shi kilomitar sawdong u don ne em u dewiong u bym pat dep ban shim jingkhein,” u la ong.

 “Ia ka kaiphod halor ka jingjurip kaba na suin la dep ban aiti ha ka 19 tarik Lber bad la iakren ha kane ka jingialang hynne ka sngi Nyngkong, hynrei Nga kwah katto katne ki jingpynshai bad nga la bthah ia ki ba kin ai ha nga ia kita ki jingpynshai ia kaba nga khmih lynti ban ioh lashai ka sngi,” bynrap u Katakey.

Ha kaba iadei bad ka jingujor jong ki sawngut ki briew pyrshah ia ka kam tih dewiong beain ha South Garo Hills, u Katakey u la ong ba ka jingtohkit halor kane ka bynta la dep ban aiti sha ka committee ba la khlieh da u Naba Bhattacharjee sha u.

“Namar ki dang don ki jingtohkit ki ban dang bteng shuh shuh, ka sorkar ka la bthah ia u Deputy Commissioner ka South Garo Hills ban pynlong ka jingleit pynshisha dalade bad ban aiti ia ka kaiphod hapoh ka shitaiew. Kumta, ia kane ka kaiphod ngi khmih lynti ba ngin ioh hadien ka shitaiew,” u la bynrap.

Ha kaba iadei bad ka kam tih dewiong da ka juk jingstad saian ha Meghalaya, u Katakey u la ong, “Ki dei ban don ki bor ki ban khmih halor kane. Ym don kiba lah ban batai halor ka jinglah ban don ka kam tih dewiong beain hangne ha Meghalaya, hynrei kawei ka kam kaba la pyntip sha nga ka long ba ha ka jingai jingbit bad kano kano ka jingbit ba la ai ban tih dewiong katkum ka juk jingstad saian ka don ka kyndon kaba ngam apt iohi, hynrei la pyntip sha nga ba ia ka jingkitkhlieh la tynrong ha ki nongtih dewiong ba kin tep lut ia baroh ki thliew ba la shem hapoh ka shi kilomitar sawdong na ka jaka kaba ki trei.”

Nalor kata u la ban jur ba kano kano ka jinglap ia u dewiong shabar jong ka jaka lum ia u dewiong ne depot ba la buh da ka Coal India Limited (CIL) ka dei kaba beain hapoh ka jylla Meghalaya.

“Kumta uno uno u dewiong ba la lap shabar ka jaka lum thup ba la ithuh da ka CIL u dei uba beain, bad kumta ka dei ka jingkitkhlieh jong ka sorkar ban leh iala ka kamram katkum ka MMDR Act.”