Pan jubab ka Meghalaya High Court na u SP East Jaintia Hills halor ka kam khaii bad tih dewiong beaiñ

Syllad | The Rising MeghalayaDecember 8, 2022

Namar ka jingbteng ka jingtih bad jingshalan dewiong beain ha East Jaintia Hills wat hadien ka jingmana kaba tyngeh, ka High Court of Meghalaya haka sngi Balang kala pan jubab na SP ka East Jaintia Hills hapoh ka ‘rule of contempt’.

Ka Iingbishar ba ha khlieh duh ka jylla ne ka Meghalaya High Court kala rai ban shim ia ka sien jam pyrshah ia u Superintendent of Police (SP) ka East Jaintia Hills District da kaba ishu da ka ‘Rule of Contempt’ ban pan jubab hadien ba ka la ioh pdiang ia ka kaiphod jong ka jingiai bteng jong ka kam ban tih beaiñ ia u dewiong bad ban khaii pat ia u shabar na kane ka district.

Ia kane kane ka hukum la rai ia full bench hapoh ka jinglam khmat ka jong u Chief Justice u Sanjib Banerjee, Judge W. Diengdoh bad u Judge HS Thangkhiew kaba long kat kum ka kaiphod kaba la pan lyngba u Justice BP Katakey na u Deputy Commissioner, East Jaintia Hills, kaba la wan ban mih paw lyngba ka lad pathai khubor kaba la thoh “wonder caves in Jaintia Hills are at risk from rampant mining”.

Kat kum ka kaiphod jong ka ophis Deputy Commissioner haka 3 tarik Nohprah jong une u bnai, ka la kdew baka la don ka jingpyrshang beaiñ ban tih ia u dewiong da kaba pyndonkam ruh ia ki tiar ban shu pynbthei, kaba da kylla ka wanrah ia ka jingma kaba khraw ia ka Krem Liat Prah kaba don ha ka Shnongrim, ba hap hapoh East Jaintia Hills. Dei halor kane ka  jingjia ba u Deputy Commissioner u la bthah ia  Magistrate ba donkam ban leit ban jurip khah khah bad bynrap da ka jingpynjari wat ia ka kyndon ain jong ka Section 144 of the Criminal Procedure Code, 1973.

Kumban shu pynpaw ban a ka liang u Justice Katakey, u la de ba un aiti ia ka kaiphod ba 9 ka jong u (ninth interim report) ha ka por ka jingia shong bishar ia ka PIL kaba iadei bad a kam tih bad khaii beain ia u dewiong ha ka jylla. Dei lyngba jong u, ba kiba bun ki kaiphot, ki kren bad pynpaw shai baka don ka jingbym kohnguh ne ban burom daka jylla ia ki jingbthah ne hukum ka iing bishar. Shuh shuh ka iing bishar kaba la shong ban shim bad ban lum jingkhein ia ka jingdon u dewiong kiba la dep ban tih ha shwa ka jingpynjari ia ka ain ban khang tih dewiong, ka kaiphot  u Chief Secretary ka jylla kaba long ha ka 20 tarik u Nailur 2022, ka kam ba u don hadien that 32,56,715 MT uba lah ban lilam (auction) ia u.

Katba ka kaiphot u Justice Katakey ka long shwa ka jingpyntreikam iaka hukum ban khang tih dewiong, u dewiong uba la dep ban tih bad sei lypa ia u shabar na kipar tih u don haduh 19,54,258.816 MT ha kaba (1)East Jaintia Hills – 8,90,670 MT (2) West Khasi Hills – 3,86,253 MT (3) South Garo Hills – 3,77,790 MT (4) South West Khasi Hills – 2,99,545.816 MT.

Kumta haba  pynshong nongrim ia ki jingkhein jingdiah baroh ka iing bishar ka lap bad shem ba 19,54,259 MT ne 13 lakh MT la lap ba la dep ban tih bad ruh ban die beain biang ia u. Dei halor jong kane, ba ka iing bishar, khlem don shuh kano kano ka jingartatien, ba 32.56 lakh MT kumba la pynpaw da u Chief Secretary ha ka 20 tarik u Nailur 2022 la lap ba ka la don ka jingtih beain biang ia u, kaba da kylla ka kaiphot naka jylla ka pynpaw baka jingshalan bad khaii ia u dewiong ka long beit kat kum ka por kaba la buh ne ba la pyllait ia u.

Ha ka jingshisha, ka hukum na u Justice Katakey ka kwah b aka sorkar jylla kan shimkhia ia kane ka kam da kaba wat baka dei ban pyndait bad ki kor ban buddien ia ki kali ba kit bad khaii ia u dewiong ne GPS, ia kaba ka kam ban leh ia kane ka long kaban bam por, hynrei khnang ban iaid lang ryngkat bad ka hukum, ka sorkar ka la shim da kiwei pat ki sien jam ban leh ia kane ka kam bad buh thong ban pyndep pura ha lane shwa kaba kut jong u bnai Nohprah mynta ka snem.

Ka jingshim bishar biang halor kane ka case la buh ban long ha ka 7 tarik u Rymphang u snem ban wan.