Pan kaiphod ka Meghalaya HC na ka Sorkar halor ki sienjam ban iada ia ka Wah Myntdu

Syllad | The Rising MeghalayaNovember 19, 2024

Ka iingkashari Meghalaya High Court ha ka 19 tarik Naiwieng ka la hukum ia ka Sorkar Jylla ba kan aiti ia ka kaiphod ha kaba iadei bad ki sienjam ba ka la shim na ka bynta ban ai jingiada ia ka wah Myntdu ha Rilum Jaintia.

Ha ka hukum jong ka ba la pynmih hadien ba la shong bishar ia ka PIL halor kane ka phang, ka kynhun ki nongbishar kaba kynthup ia u Chief Justice Indra Prasanna Mukherji bad u Justice W Diengdoh ka la ong, “La bthah ia u Amicus Curiae ban ai ia ka kaiphod hapoh ka 28 tarik u Rymphang 2025. Ka Sorkar kan hap ban ai ia ka kaiphod kaba kdew ia ki sienjam kiba ka la shim bad ruh ban iaid katkum ka kaiphod jong u Amicus Curiae hapoh ka 13 tarik u Lber 2025.”

U Amicus Curiae P Yobin ha ka kaiphod jong ka jingleit jurip lang u la kdew bniah ia ka jingkongsan jong ka wah Myntdu kaba tuid lyngba ka Rilum Jaintia bad kaba poi shapoh Bangladesh.

Kane ka wah ka la ai um ia ki artylli ki jaka them ba seisoh ha ka rep ka riang ha kane ka thain, kata ka Pynthor Nein bad Pynthor Wah, kaba la bsa ja ia haduh kumba 40,000 ngut ki briew. Ia kane ka wah la mane kum ka Blei bad niew ia ka kum ka Tawiar Takan da ki nongshong shnong kiba dei ki trai shnong.

Ka jingeh kaba la pynpaw ha ka jingujor ka long ba ka Sorkar ka la ai jingmut ban pyntrei ia ki jingtei harud jong kane ka wah. Kiba kum kine ki jingtei ki la mih da kiba bun bah bad kiba lam sha ka jingtuid ki jakhlia shapoh jong ka ri. Kaba ar ka long ba ka Sorkar kam shym la shim ia ki sienjam kiba donkam ban pynsangeh ia ka jingtuid jong ka khyndew shapoh ka wah kaba lam sha ka jinglang jong ki jakhlia hapoh jong kane ka wah. Kine baroh ki la khang ia ka jingtuid jong ka um sha ki jaka rep jaka riang, na ka bynta ka umbam umdih bad na ka bynta kiwei pat ki jingdonkam.

Ka kynhun ki nongbishar watla katta ka la pynpaw ba ka sngewhun na ka kaiphod ba la ai mynta ka sngi da u AAG ba na ka liang ka sorkar ka la shimkhia ban iada na ka jingtwa khyndew bad kumjuh ruh ban pynkhuid ia ki jaboh jabaiñ kiba mih na ki jingshna ia ki iing kiba la lang ha kane ka wah.