Pan kaiphot ka Meghalaya HC halor ka jingpyntrei ia ka surok Shillong-Dawki 

Syllad | The Rising MeghalayaSeptember 29, 2023

Ka iingbishar Meghalaya High Court ha ka sngi Balang ba la lah ka la pan ia ka kaiphot na ka sorkar jylla ba lano kan sdang pyntreikam noh ia ka phase I jong ka surok Shillong – Dawki hadien ba la aijingbit ha kaba iadei bad ka jingpynkhyllem ia ki dieng.

Katkum ka hukum ba la pynmih ha katei ka sngi Balang, ka division bench ka la ong; “Kumba la bthah kham hashwa, ba kam dei shuh ban dang don ka jingpynkhyllem ia ki dieng ha Shillong kumjuh ha ki jaka kiba hap ha ka jingpyntrei na ka bynta kane ka phase I lada kam pat don ka jingpynthikna ba lano yn sdang pyntrei noh ia kane ka kam.”

Ka la ong ruh ba ka NHIDCL bad ka Sorkar Jylla ki dei ban aijingtip sha kane ka iingbishar lano kin sdang pyntrei noh ia kane ka surok na ka bynta ban aijingmut halor ka jingpynkhyllem noh ia ki katto katne ki dieng ki bym lah satia ban kiar.

Na ka liang u nongmudui u Kaustav Paul uba la wan  mihkhmat hi da lade ula pyntip ba ka kaiphot bala file na ka bynta ka Sorkar Jylla kam shym la pynpaw shai kdar ba lano ka jingpyntrei ia kane ka phase-I jong ka surok Shillong-Dawki kan sdang noh.

Katkum u nongmudui la ong ruh ba watla ka kaiphot ka la kren shai ha kaba iadei bad  ka jingaiti ia kane ka kam sha u kontraktor shibun, hynrei ka kaiphod ka kdew ba ka National Highways and Infrastructure Development Corporation Limited kin khmih ha kaba iadei bad ka jingioh jaka na ka bynta kaba kum kane ka phasi jong ka jingpyntrei ia ka kam na ka jaka kaba hap hapoh ka jingkhmih jong ka tnat shipai bad ba kan iamir jingmut ruh bad ka sorkar jylla ha kaba iadei bad kino kino kiwei pat ki jaka.