Pan kaiphot ka MHRC na ka sorkar halor ka jingjshah pyniap u nongbylla ha Mawlai

Syllad | The Rising MeghalayaApril 13, 2024

Ka Meghalaya Human Rights Commission (MHRC) haka 12 tarik Iaiong, ka la pan kaiphot na ka Sorkar Jylla ha kaba iadei bad ka jingjia shah pyniap jong uwei u nongtrei bylla bar Jylla kaba la jia ha ka shnong Mawlai Mawroh, Shillong ha ka 10 tarik mynta u bnai.

Na ka liang ka MHRC ka pyntip ba ka la shim suo moto case halor kane ka jingjia bad phah da ka jingthoh sha u Director General of Police (DGP) ka Jylla ban pan ia ka kaiphot hapoh ka 15 sngi halor ki sienjam ba la shim halor kane ka jingjia.

Lah ban kdew ba ha ka 10 tarik mynta u bnai uwei u nongtrei bylla sngi u la khlad noh namar ka jingmynsaw jur hadien ba u la ngat ha ka jingshah thombor ha ki riew runar ki bym lah ban ithuh ha Mawlai Mawroh.

Une u lanot uba la khlad noh na ka jingmynsaw jur hapoh NEIGRIHMS u dei uba la tip kyrteng kum u Arjun Ray 52 snem rta uba shong ba sah ha Nongmensong, Shillong.