Pan kaiphot ka MHRC na u SP halor ka jingkynnoh kam thombor u heh pulit ka Pynursla

Syllad | The Rising MeghalayaMarch 1, 2024

Ka Meghalaya Human Rights Commission (MHRC), Shillong haka 29 tarik Rymphang, ka la shimkhia ha kaba iadei bad ka jingujor ba la ujor da ka Seng Hynniewtrep Youth Council (HYC) Central Body pyrshah ia u heh pulit ka Pynursla Police Station namar ka jingkynnoh thombor ia u President jong ka HYC Riwar Mihngi Circle hapoh Pynursla Police Station kaba la jia ha ka sngi Saitjain ba la lah.

Na ka liang ka MHRC lyngba u Secretary ka pyntip ba ka la phah da ka jingthoh sha u Superintendent of Police, East Khasi Hills District ban aiti ia ka kaiphot kaba bniah sha ka Commission ha kaba iadei bad kane ka jingjia hapoh ka 15 sngi.

Lah ban kdew ba ka Seng HYC ha ka sngi Nyngkong, kala dawa ban thung ia ka jingtohkit bad ban sospon ia u 2nd Officer Incharge ka Pynursla Police Station Bah George Dkhar, halor ka jingkynnoh kren tohmet bad thombor ia arngut ki dkhot ka seng ha Pynursla Police Station ha katei ka sngi Saitjain ba la dep.

Kane ka jingjia ka la wan long hadien ba ki dkhot ka HYC-RMC ha ka 24 tarik Rymphang kila kem ia artylli ki trok kiba kit ia ki muid da ka jingthmu ban khaii tuh sha Bangladesh.

Hadien ka jingkem ia kine ki trok, kila ialam ia ki sha Pynursla Police Station da ka jingthmu ban ujor ejahar bad ban kyntu ia ki Pulit ba kin leh ia kaba donkam kat kum ka ain hadien ba ki la ngat pynban ha ka jingshah thombor ha une u heh pulit.