Pan kaiphot ka Sorkar ba khyllem ka kynroh jong ka PA Sangma Sports Complex

Syllad | The Rising MeghalayaJune 3, 2024

Katto katne ki bynta ka kynroh jong ka PA Sangma Sports Complex kaba don marjan ka Sewage Treatment Plant bad ka Indoor Hall 2 kaba dang don hapdeng ka jingpyntrei ka la khyllem noh ha ka step jong ka 2 tarik Jymmang.

“Ka jingkhyllem jong kane ka kynroh kam shym la ktah satia ia ki jingtei kiba kongsan jong ka stadium,” ong ka Director of Sports and Youth Affairs ka Kong Isawanda Laloo lyngba u kyrwoh.

Ka la ong ruh ba ka kompeni Hindustan Steelworks Construction Ltd. (HSCL), kaba pyntrei ia ki jingtei jong baroh kane ka Sports Complex ba kan aiti ia ka kaiphot kaba bniah ha kaba iadei bad kane ka jingjia.

Ka Kong Laloo ka la ong ba ka jingther u ‘lapbah ka la wanrah ka jinglang um bad pynshlei ia ka nala kaba la dep ban shna na ka bynta ban pyntuid ia ka um, ki jaka na ka STP tank, Indoor Hall 1, Indoor Hall 2 bad napoh Complex.

“Hynrei namar ka jingpyntrei ia kine ki bynta ka dei kaba dang iaid shakhmat bad bym pat lah ban pyndep lut ia kane ka nala, kumta ruh kane ka l wanrah ia ka jinglang jong ka um na ka jingther jong u ‘lapbah bad wanrah ia kane ka jingkhyllem jong kane ka kynroh,” ka la bynrap.

Nalor kata haba pynpaw ba kane ka kynroh kaba khyllem ka dei kaba la shna na ka bynta shi por ban phiah ia u pud bad ban khanglad ia ka jingkyntur jaka, ka la ong ba kiwei pat ki jingtei ha kane ka jaka ki dang iaid shakhmat bad ia ki jingtip ba kham bniah yn sa ai hadien ba ka ophis ka la ioh ia ka kaiphot na ka kompeni kaba pyntrei.

Shuh shuh ka Director ka pyntip ruh ba ki bor District ka West Garo Hills ki la shim mardor ia ki sienjam ban pynthikna ia ka jingshngain jong ki paidbah nongshong shnong jong ka thain.

Ia kawei ka longiing kaba la shah ktah na kane ka jingkhyllem kynroh la pynkynriah bad aijingiarap kaba kynthup ia ka jaka shong jaka sah, ki marbam mardih bad baroh ki jingdonkam, ka la ong.