Pan map ka kompeni Topcem ba kren pynshit ki nongtrei ha ka jingialang ha Thangskai

Syllad | The Rising MeghalayaAugust 26, 2023

Ki bor pyniaid ka kompeni Meghalaya Cement Limited (Topcem) ki la pan map ha kaba iadei bad ka jingkren pynshit bad kren khor jong ki nongtrei jong ka ha ka por ba mih ka jingiakynad hapdeng ki paidbah bad ki bor pulit ha ka por ba thmu ban pynlong ia ka public hearing ha ka 24 tarik mynta u bnai ha ka shnong Thangskai, East Jaintia Hills.

Katkum katei ka jingjia kaba la saphriang ruh lyngba ki social media la iohi ia ki arngut ki nongtrei jong katei ka kompeni kiba la pynshit ia ki bor pulit ha ryngkat ka jingpynmih ia ki kyntien kiba khor ban bom ban jied ia ki paidbah.

Na ka liang ki bor pyniaid jong kane ka kompeni ki la ong ba ki la shimkhia halor kane ka jingjia bad mardor ki la pynsangeh kam ne sospon noh ia kine ki nongtrei kiba hap ha ka kyrdan Administrative Officer.

“Ngi pynthikna sha ki paidbah ba na ka liang ka kompeni Topcem ka kut jingmut na ka bynta ban pynneh pynsah ia ka shongsuk shongshngain hapdeng ki nongtrei bad ki paidbah nongshong shnong jong ka thain ba marjan kiba don ka jingiadei bad kane ka kompeni jong ngi, bad ngi pynthikna ruh ba kum kine ki jingjia kin ym wan jia shuh hadien habud,” ong ki bor pyniaid ka kompeni.