Pan por biang ka HPC ban ai jubab halor ka jingthmu pynkynriah na Them Metor, Iew Mawlong

Syllad | The Rising MeghalayaAugust 26, 2024

Ka Harijan Panchayat Committee (HPC) haka 26 tarik Nailar  ka la kyrpad ia ka Sorkar Jylla ba kan pynjlan biang ia ka jingai por ban jubab ha kaba iadei bad ka Blueprint ban pynkynriah ia ki 342 iing napoh Them Metor, Them Iew Mawlong.

Kane ka la wan long ruh hadien ba ka jingai por ba 15 sngi jong ka sorkar Jylla ia ka HPC ba kan ai ia ka rai kaba khatduh halor kane ka jingthmu ka la kut noh hynne ka sngi Nyngkong.

Ha u kyrwoh u Secretary ka HPC u Gurjit Singh u la ong hadien ka jingialang kaba dang shen na ka liang u Symbud Myntri Rangbah ka Jylla u la aijingmut ba ka Committee kan ai ia ka rai kaba khatduh hapoh jong ka ar taiew, hynrei na ka liang ka Harijan Panchayat Committee ka la pynpaw ba kane ka jingai por ka dang khyndiat eh ia ki namar ba kin hap ban iamir jingmut bad ki bor ba halor jong ki nongshong shnong Sikh.

“Ngi don ia ka jingthmu ban iasyllok bad u Janthedar jong ka Sri Akal Takht Sahib, ka Shiromani Gurdwara Prabandhak Committee ha Amritsar, ka Delhi Sikh Gurdwara Management Committee bad kiwei pat ki kynhun seng bad ki nongialam ba halor. Ka jingbtin lynti ka jong ki ka dei kaba kongsan,” ong u Singh.

“Da kaba shim halor ki kam kiba dang bun kumba long mynta bad halor ki jingkut jingmut kiba la dep jong ki nngialam niam Sikh, ki la pynpaw ba kin ym lah satia ban iasyllok ei ei na ka bynta kine ki ar ne lai taiew ki ban wan.”

Ka shithi ka la kdew ruh ba halor kine ki daw, ka Harijan Panchayat Committee ka buh ka jingkyrpad ba ia ka jingialang kaba bud halor kane ka phang dei ban pynlong ha ka taiew kaba khatduh jong u bnai Nailur u ban wan. Na ka liang ka Committee ka kyrmen skhem ruh ba kat haduh katei ka por kin lah ban ai ia ka jingpynsngew kaba biang ka ban pynshong nongrim ruh halor ka jingsngew jong ki nongshong shnong hi baroh.

Kumta ruh na ka liang ka HPC ka la pan ia ka jingiatreilang jong ka sorkar Jylla ha kaba iadei bad kane ka bynta, ong u Singh.