Pass Coach Athletic & Football ki arngut ki samla na Rilum Jaiñtia

Syllad | The Rising MeghalayaApril 28, 2019

JOWAI: Arngut ki samla ïalehkai sports jong ka Rilum Jaiñtia kila jam sha uwei pat u mawmer haka jingim ïalehkai ka jong ki, kata ba kin long noh ki nonghikai ban saiñdur ïaka kam ïalehkai ki khynnah haka District bad ka Jylla hadien ba kila pyndep ïaka jingpule coach na Netaji Subhas National Institute of Sports (NSNIS).

Kine ki ar ngut ki samla ki dei u Pleasantly Synnah, uba na Jowai, uba la pyndep ïaka jingpule Diploma Course In Sports Coaching haka Athletics bad ka samla Batbitbha Bareh na Khliehriat kala pyndep ïaka Diploma Course In Sports Coaching haka Football.

Baroh arngut ki dei na ka batch 2018-19 jong ka SAI, Netaji Subhas Eastern Centre, Kolkata. La pynkup burom ïaki da kane ka kyrdan haka 24 tarik une u bnai haka ‘36 Annual Convocation of Diploma Course In Sports Coaching’ ha Kolkata.

Ka Batbitbha Bareh kan leit ban shah hikai pyntbit ïalade haka kam coach football sha Kerala bad u Pleasantly Synnah ula leit shah hikai pyntbit haka Athletic sha Jharkhand.