Paw ka thain Umiam kum ka jaka ba kongsan ki sim kiba im ha um

Syllad | The Rising MeghalayaFebruary 6, 2024

Ka  tnad Meghalaya Forest & Environment  lyngba ka ophis treikam jong ka Divisional Forest Officer, Khasi Hills Wildlife Division Shillong  ha ka jingïatreilang bad ka Meghalaya Biodiversity Board ha ka 2 tarik u Rymphang, 2024 ka lah rakhe pynlong ïa ka Asian Waterbird Census, 2024 ne ka khana samari jong ka jingdon ki sim kiba im ha um ba kynthup ha Umsaw, Umbir, Umniuh, Mawlyndep bad Umiam ba kynthup ki jaka sngem jong ka wah Umiam, Ri-Bhoi District, Meghalaya  ha ka jingkyrshan bad ai jingmut jong ki riewstad bad shemphang ha kane ka liang.

Ka Kong Hesia Lato, IFS, DFO Social Forestry Division, u Bah M.Kharsyntiew, MFS, Assistant Conservator of Forests, na ka liang ki  seng NGO kum na ka Aaranyak ba kynthup ïa u Dr. Dipankar Lahkar bad u Pranjal Deka, ki riewshemphang na ka tnad Meghalaya Biodiversity Board  ka Kong (Dr) E. Khongwir bad u Shri (Dr.) S. Dey  ruh ki dei kiba la wan ban ïashim bynta lang ha kane ka program.

Ka Asian Waterbird Census (AWC) ka long shibynta ba ïadei bad ka jingrakhe ïa ka International Waterbird Census (IWC). Kane ka program la ju pynlong na ka bynta ban pynneh pynsah bad ïada ki jaka sngem bad kumjuh ruh na ka bynta ki sim-um ha satlak ka pyrthei bad ka dei kaba ju leh manla ka shisien snem hapdeng u bnai Kyllalyngkot bad Rymphang, bad hakine ki program ki briew kiba don bynta bad kine ki jaitkam ha kylleng ka dewbah Asia bad Australia ki  ju leit ban jurip ki jaka sngem kiba don ha ki ri jong ki bad leit ban ñiew ïa ki sim kiba ju im ha kum kine ki jaka.

Ha kane ka program ba la pynlong ha kane ka jylla la pyntip ba ki don 155 tylli kin ki jait sim ba kynthup haduh 13 jait.

Kane ka sngi la ju rakhe ha kylleng ki ri ka pyrthei kum ka “World Wetland Day ”bad kane ka jingñiew ka jingbun paid jong ki la pynlong ban ai jingïada bad pynneh pynsah ban lait na ka jingshah pynjulor jong kine ki jaka ba sngem kiba long ki jaka shong jaka sah jong kitei ki jait sim manla u snem ha ka aïom jong ki jingphet jong ki na kawei ka jaka sha kawei pat. Hapdeng ba la pynlong kane ka program la shem ba ki jaka sngem jong ka Umiam kum kawei na ki jaka sngem ba kongsan tam na ka bynta kine ki jait sim.